تفصیلات کے مطابق  ملک بھر میں کورونا وائرس کی تیسری لہر کے حملوں میں تیزی آگئی ہے، علامہ اقبال اوپن یونیورسٹی نے ملک بھر میں جاری امتحانات ملتوی کردئیے ہیں ۔

علامہ اقبال اوپن یونیورسٹی کیجانب سے جاری اعلامیہ میں کہا گیا ہے کہ  نئے شیڈول کا اعلان عید الفطر کی چھٹیوں کے بعد کیا جائے گا، یونیورسٹی نے ملک بھر میں قائم اپنے علاقائی دفاتر کے منتظمین سے اسکولوں کی بندش کے بعد امتحانات کے لیے رائے طلب کی تھی،امتحانات کو ملتوی ریجنل دفاتر کے ڈائریکٹرز  کی تجاویز کے تحت کی گئی۔

اعلامیہ میں کہا گیا ہے کہ  فیصلے کے تحت ایسوسی ایٹ ڈگری، بی ایڈ اور بی بی اے کے جاری امتحانات ملتوی کیے گئے ہیں، بی ایس اکاونٹنگ اینڈ فنانس اور بی ایس پروگراموں کے فائنل امتحانات بھی ملتوی کردیے گئے ہیں ، جبکہ امتحانات کی نئے تاریخوں  کا اعلان بعد میں کیا جائے گا۔ملتوی امتحانات عید کی چھٹیوں کے بعد منعقد ہونے کا امکان ہے۔

نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید118افراد چل بسے ۔ ملک میں  اموات کی مجموعی تعداد 17 ہزار 117ہوگئی ہے،جبکہ  متاثرہ افراد کی مجموعی تعداد 7 لاکھ 95ہزار 627ہو گئی ہے ۔

پنجاب

پنجاب میں کورونا مریضوں کی تعداد 2لاکھ88ہزار 598ہوگئی ۔ جبکہ صوبے میں اب تک 7ہزار 964افراد جان سے ہاتھ دھو بیٹھے ہیں ۔

سندھ

سندھ میں کورونا وائرس سے سب سے زیادہ متاثرہ مریضوں کی تعداد  2 لاکھ 77ہزار 593ہو گئی جبکہ صوبے میں اب تک 4 ہزار593 افراد جان کی بازی ہار گئے ۔

خیبرپختون خوا

خیبرپختون خوا میں کورونا وائرس سے متاثرہ مریضوں کی تعدادایک لاکھ 13ہزار121ہوچکی ہے ۔ صوبے میں 3103افراد چل بسے۔

بلوچستان

بلوچستان میں کورونا وائرس کے اب تک 21ہزار618کیسز رپورٹ ہوئے ہیں جبکہ صوبے میں232مریض چل بسے ۔

اسلام آباد

وفاقی دارالحکومت اسلام آباد میں مجموعی طورپرمتاثرہ افراد کی تعداد72 ہزار981جبکہ اموات کی تعداد660تک جاپہنچی ۔

گلگت بلتستان

گلگت بلتستان میں اب تک 5 ہزار253افراد کورونا کا شکار ہوئے ہیں جبکہ 104افراد جان سے ہاتھ دھو بیٹھے ۔

آزاد کشمیر

آزاد جموں کشمیرمیں کورونا سےمتاثرہ افراد کی تعداد 16 ہزار463ہوچکی ہے جبکہ 461افراد جان کی بازی ہار گئے ۔

ملک بھرمیں صحت یاب ہونے والے افراد کی تعداد بھی تیزی سے بڑھنے لگی ہے، این سی اوسی کے مطابق گزشتہ  24گھنٹوں میں 5685افرادکوروناوائرس کوشکست دےچکے ہیں۔ ملک بھر میں اب تک 6لاکھ82 ہزار290مریض کورونا کو شکست دے چکے ہیں ۔