آسٹریلیا کی کرکٹ ٹیم کے مایہ ناز اوپننگ بلے باز عثمان خواجہ ایشز سیریز جیتنے کےلئے پرعزم

آسٹریلیا کی کرکٹ ٹیم کے مایہ ناز اوپننگ بلے باز عثمان خواجہ نے کہا ہے کہ وہ میزبان ٹیم کے خلاف ایشز سیریز کے دوسرے ٹیسٹ میچ میں بھی اپنی عمدہ کارکردگی کی بدولت ٹیم کی فتح میں اہم کردار ادا کریں گے۔

انہوں نے کہا کہ وہ مکمل طور پر فٹ اور بھرپور فارم میں ہیں اور اپنی ٹیم کو انگلینڈ کے خلاف ایشز سیریز کے آئندہ میچوں میں بھی فتح دلانے کے لئے پرعزم ہیں۔ انگلینڈ کے شہر برمنگھم میں کھیلے گئے ابتدائی ٹیسٹ میچ میں آسٹریلیا نے میزبان انگلینڈ ٹیم کو سنسنی خیز مقابلے کے بعد 2 وکٹوں سے شکست دے کرایشز سیریز میں 0-1کی برتری حاصل کرلی تھی۔

دونوں ٹیموں کے درمیان سیریز کا دوسرا میچ 28 جون سے لارڈز ، لندن میں شروع ہوگا۔پہلے ٹیسٹ میچ میں انگلینڈ کے خلاف مین آف دی میچ کا اعزاز پانے والے آسٹریلوی اوپننگ بلے باز عثمان خواجہ نے اپنے ایک بیان میں نے کہا کہ وہ انگلینڈ کے خلاف پہلے ٹیسٹ میچ میں اپنی کارکردگی سے مطمئن ہیں۔ انہوں نے کہا کہ انکی ٹیم میزبان ٹیم کو آئندہ میچزمیں بھی شکست دیکر سیریز اپنے نام کرے گی۔

جس کے لئے ہم نے حکمت عملی تیار کر رکھی ہے۔ انہوں نے کہا کہ دوسرے ٹیسٹ میں کامیابی کے لئے مربوط حکمت عملی کے تحت میدان میں اتریں گے۔36 سالہ عثمان خواجہ نے انگلینڈ کے خلاف پہلے ٹیسٹ کی پہلی اننگز میں 141 جبکہ دوسرے اننگز میں 65 رنز بناکر اپنی ٹیم کی فتح میں کلیدی کردار ادا کیا تھا