بجلی کی قیمتوں میں اضافہ واپس لیا جائے،ایم کیو ایم کا حکومت سے مطالبہ

متحدہ قومی موومنٹ پاکستان کے کنوینر خالد مقبول صدیقی نے حکومت سے مطالبہ کی اہے کہ بجلی کے بلوں میں اضافہ واپس لیا جائے۔ انہوں نے کہا کہ خدشہ ہے کہ بجلی کے بلوں میں اضافے کے خلاف احتجاج فسادات میں تبدیل نہ ہو جائیں۔

کراچی میں پارٹی رہنماؤں کے ہمراہ پریس کانفرنس کرتے ہوئے خالد مقبول صدیقی نے کہاکہ واپڈا کے سرکلر ڈیٹ کا تعلق پورے پاکستان سے ہے،ایم کیو ایم فوری انتخابات کی خواہش مند ہے،سب سے جلد ی انتخابات ہونے کی ضرورت اس شہر میں ہے،کون لوگ ہیں جو نئی مردم شماری کے بعد پرانی حلقہ بندیوں پر انتخابات چاہتے ہیں،انتخابات صاف شفاف غیرجانبدار اور سب کیلئے قابل قبول ہونا چاہئیں۔

خالد مقبول صدیقی نے کہا کہ ہم نے مذاکرات کا وعدہ کیا تھا اور اس پر عمل کرتے رہیں گے، کراچی کو واپڈا کی ذمے داری سے دور اور باہر رکھا گیا ہے۔سرکلر ڈیٹ کا دباؤ کے الیکٹرک کے مالکان پر نہیں صارفین پر آرہا ہے، فوری ریلیف کے اقدامات کرنا حکومت وقت کی ذمے داری ہے۔حیدرآباد میں 12 سے 14 گھنٹے کی لوڈشیڈنگ ہو رہی ہے، حیدرآباد کے تاجر احتجاج پر مجبور ہو رہے ہیں، 12 سے 14 گھنٹے کی لوڈشیڈنگ ہو رہی ہے اور بل وہی آرہا ہے، ہم نے پہلے بھی ایوانوں میں بات کی ہے اب بھی بات کریں گے۔

حلقہ بندیوں پر ایم کیو ایم رہنما نے کہاکہ جس طرح ہمارا حق نمائندگی چھینا گیا کسی کا نہیں چھینا گیا،یہ کون سے لوگ ہیں جو نئی حلقہ بندیوں کی بجائے پرانی حلقہ  بندیوں پر زور دے رہے ہیں،جعلی اور ایماندارانہ انتخابات میں چند ہفتوں کا فرق ہو تو کچھ غلط نہیں،پچھلے انتخابات میں حقیقی کے بجائے جعلی نمائندگی مسلط کی گئی۔کراچی میں جرائم جس طرح بڑھ رہے ہیں وہ سنگین خطرہ ہے،نئی مردم شماری کے بعد کئی کروڑ ووٹرز شامل ہوئے ہیں،کوئی آئین اجازت نہیں دیتا کہ نئی مردم شماری کے بعد نئی حلقہ بندیاں نہ ہوں،اگر حلقہ بندیوں کیلئے ہفتوں اور مہینوں کا وقت لگ رہا ہے تو یہ خسارے کا سودا نہیں۔

اس موقع پر ڈاکٹر فاروق ستار نے کہا کہ ملک تیزی سے افراتفری کی جانب جارہا ہے، بجلی کے بلوں میں اضافہ عوام کی پہنچ سے نکل گیا ہے۔2 ہزار کے بجلی بل میں 48 فیصد ٹیکس ہے، دنیا میں بجلی استعمال کرنے پر ٹیکس نہیں ہوتا۔بجلی کے بل پر 13 قسم کے ٹیکسز ہیں، لوگوں میں بغاوت کا رجحان آرہا ہے اور لوگ باغی ہوتے جارہے ہیں۔  ملک سول نافرمانی کی جانب جارہا ہے، اگر یہی رجحان رہا تو اسٹیٹ کے اندر اسٹیٹ بنے گی، ملک کے تاجروں کے ساتھ مکمل یکجہتی کا اظہار کرتے ہیں۔

واضح رہے کہ ملک کے کئی شہروں میں حالیہ دنوں کے دوران بجلی کے بھاری بلوں کے خلاف عوام نے احتجاج کیا تھا