سمیٹری گروپ لمیٹڈ کی پی ایس ایکس پر لسٹنگ کے لیے تقریب کا انعقاد

کراچی: پاکستان اسٹاک ایکسچینج (پی ایس ایکس)میں سمیٹری گروپ لمیٹڈ (ایس جی ایل) کی لسٹنگ کی مناسبت سے ایک گونگ تقریب کا انعقاد کیا گیا۔ سمیٹری گروپ لمیٹڈ کو یکم ستمبر 2023کو پی ایس ایکس پر لسٹ کیا گیاتھا۔ سمیٹری ایک پریمیم ڈیجیٹل ٹیکنالوجی کمپنی ہے جو ڈیجیٹل مصنوعات اور خدمات میں مہارت رکھتی ہے۔ یہ ایکسچینج کے لسٹڈ ٹیکنالوجی سیکٹر میں ایک قابل قدر اضافہ ہے اور سرمایہ کاری کے لیے اس شعبے میں ایک اور آپشن ہوگا۔

سی ای او سمیٹری گروپ سروش احمد اور سیمیٹری گروپ کی سینئر مینجمنٹ، ٹاپ لائن سیکیورٹیز لمیٹڈ کے سی ای او محمد سہیل اور ان کی ٹیم اس موقع موجود تھی۔ ٹاپ لائن ایشو اور بک رنر کے کنسلٹنٹ تھے۔ پاکستان کرکٹ ٹیم کے سابق کپتان اور سمیٹری گروپ کے ایک اہم سرمایہ کار وسیم اکرم اس تقریب کے نمایاں مہمانوں میں شامل تھے۔ پی ایس ایکس کے ایم ڈی اور سی ای او فرخ ایچ خان، بورڈ اراکین اور پی ایس ایکس کی اعلی انتظامیہ نے مہمانوں کا استقبال کیا۔

لسٹنگ کے تحت 101,240,082عام حصص ایشو کیے جائیں گے جو ایس جی ایل کے آئی پی او کے بعد کے کل ادا شدہ سرمائے کا 35.49 فیصدہے اور ایک کی قیمت ایک روپے ہے ،ایشو کے کل سائز میں سے 88,235,294 حصص کمپنی کی جانب سے نئے شمارے کے طور پر جاری کیے گئے جبکہ ایس جی ایل کے اسپانسرز کی جانب سے 13,004,788 حصص فروخت کے لیے پیش کیے گئے تھے۔