پاکستان کی مسجد اقصیٰ میں عبادت گزاروں پر حملے کی شدید مزمت

تفصیلات کے مطابق ترجمان دفترخارجہ زاہد حفیظ چوہدری کا کہنا ہے کہ اسرائیلی قابض افواج کے حملوں میں بہت سے نہتے عبادت گزار زخمی ہوئے، رمضان میں ایسے حملے انسانیت اور انسانی حقوق قوانین کی کھلی خلاف ورزی ہیں، ہم زخمیوں کی جلد صحت یابی کے لیے دعاگو ہیں۔

انہوں نے کہا کہ ہم فلسطین کی جائز جدوجہد کے لیے اپنی حمایت کی تجدید کرتے ہیں، ہم عالمی برادری پر فلسطینیوں کی حفاظت کے لیے فوری ایکشن کے لئے دباو ڈالتے ہیں۔

ترجمان دفتر خارجہ نے کہا کہ خطے میں دائمی امن کے لیے اقوام متحدہ اور او آئی سی کی قراردادوں کے مطابق دو ریاستی حل کی ضرورت پر زور دیتے ہیں، ایسا حل جس میں سرحدیں 1967 سے قبل اور القدس فلسطینی ریاست کا دارالحکومت ہو۔