ہمیں سیاست کے بجائے معیشت پر توجہ دینی چاہیے، آصف زرداری

اسلام آباد: پاکستان پیپلز پارٹی (پی پی پی) کے شریک چیئرمین اور سابق صدر آصف علی زرداری نے کہا ہے کہ ہم سب کو سیاست کے بجائے پہلے معیشت کی فکر کرنی چاہیے۔

ایک بیان میں آصف زرداری نے کہا کہ ہمیں چیف الیکشن کمشنر اور تمام ارکان پر مکمل اعتماد ہے۔ الیکشن کمیشن آف پاکستان (ای سی پی) آئین کے مطابق انتخابات کرائے گا۔

سابق صدر نے مزید کہا کہ ملک اس وقت معاشی بحران سے گزر رہا ہے۔ نگران حکومت اسپیشل انویسٹمنٹ فیسیلیٹیشن کونسل (SIFC) کے منصوبوں کو جلد از جلد مکمل کرے اور منصوبے مکمل کرکے ملک کو ترقی کی راہ پر گامزن کرے۔

آصف علی نے اپنی بات جاری رکھتے ہوئے کہا کہ مردم شماری کے بعد ای سی پی نئی حلقہ بندیاں اور انتخابات آئین کے مطابق کرانے کا پابند ہے۔

خیال رہے کہ گزشتہ روز چیئرمین پیپلز پارٹی نے ای سی پی سے 90 دن میں انتخابات کرانے کا مطالبہ کرتے ہوئے کہا تھا کہ کمیشن نے اپنی چار سالہ کارکردگی سے عوام کے سامنے اپنی ساکھ ثابت کردی ہے۔ اس نے ڈسکہ میں اپنی کارکردگی کا لوہا منوایا ہے۔ ہمیں امید ہے کہ الیکشن کمیشن آزادانہ اور منصفانہ انتخابات کرائے گا۔