پاکستان سمیت دنیا بھر میں تعلیم کو حملہ سے بچانے کا عالمی دن(آج) منایا گیا

اسلام آباد: پاکستان سمیت دنیا بھر میں آج 9ستمبر کو اقوام متحدہ کے زیر اہتمام ’’تعلیم کو حملوں سے بچانے کا عالمی دن ‘‘منایا گیا۔

اس دن کے منانے کا مقصد طلباء، اساتذہ اور تعلیمی اداروں پر حملوں اور سکولوں کو فوجی مقاصد کے لیے استعمال کرنے کی طرف توجہ مبذول کرانے کے ساتھ ساتھ تعلیم کے حق کا فروغ ، تحفظ کرنا اور مسلح تصادم میں تعلیم کو جاری رکھنے میں سہولت فراہم کرنا بشمول سیف سکولز ڈیکلریشن کے حوالہ سے عوام میں آگاہی فراہم کرنا تھا۔ واضح رہے کہ تعلیم کو حملوں سے بچانے کا بین الاقوامی دن دنیا بھر میں سرکاری اور غیر سرکاری سطح پر منایا جاتا ہے۔

یونیسیف (اقوام متحدہ کی بچوں کے حقوق کی ایجنسی) اور یونیسکو (اقوام متحدہ کی تعلیمی، سائنسی اور ثقافتی تنظیم) عالمی سطح پر اس دن کو منانے میں سہولت فراہم کرتی ہیں۔ تعلیم کو حملوں سے بچانے کےعالمی دن کی مناسبت سے ملک بھر میں سرکاری و غیر سرکاری اداروں کے زیر اہتمام مختلف پراگرامز کا انعقاد کیا گیا۔