اوورسیز پاکستانیوں کے لیے اچھی خبر،سمندر پار پاکستانیوں کو ووٹ کا حق دے دیا گیا

تفصیلات کے مطابق صدرمملکت ڈاکٹرعارف علوی کی جانب سے آئین کےآرٹیکل 89 کے تحت الیکشن (دوسرا ترمیمی) ‏آرڈیننس 2021 جاری کردیا گیا ہے جس کے تحت سمندر پار پاکستانیوں کو ملکی الیکشن میں  ووٹ کا حق دے دیا گیا ہے۔

 الیکشن ایکٹ 2017 کے سیکشن (1) 94 اورسیکشن 103 میں ترمیم کی گئی ہے۔سیکشن (1) 94 کےتحت سمندرپارپاکستانیوں کوووٹ كا حق دیا گیا ہے۔

آرڈیننس کے مطابق الیکشن کمیشن عام انتخابات میں سمندرپارپاکستانیوں کوووٹ ڈالنے کے قابل بنائے گا، ‏ الیکشن کمیشن کو نادرا یا کوئی اوراتھارٹی یا ایجنسی تکنیکی معاونت فراہم کرے گی۔ سیکشن 103 کے تحت الیکشن کمیشن عام انتخابات میں ووٹ ڈالنے کیلیے الیکٹرونک ‏ووٹنگ مشینیں خریدنے کا بھی پابند ہوگا۔

آرڈیننس سے اوورسیزپاکستانیوں کوووٹ کی سہولت، الیکٹرونک ووٹنگ اور بائیومیٹرک ‏تصدیقی مشینوں کیلئے پائلٹ منصوبوں کے متعلق شقوں کوبدلا گیا ہے۔

یاد رہے گزشتہ کئی دنوں سے ملک میں الیکٹرونک ووٹنگ اور اوورسسیز پاکستانیوں کو ووٹ کا حق دینے کی بحث سرگرم تھی جس پر اپوزیشن (ن لیگ ) کی جانب سے مکمک طور پر مخالفت کا اظہار کیا گیا تھا۔جبکہ اوور سسیز پاکستانیوں کے لیے ہمیشہ سے پی ٹی آٗئی کا دو ٹوک بیان رہا ہے کہ بیرون ملک پاکستانی ہمارا اصل سرمایہ ہیں، اور اوورسیز پاکستانیوں کا ووٹ ان کا بنیادی حق ہے ۔

واضح رہے اوورسیز پاکستانیوں کو ووٹ دینے کا حق حکومتی جماعت پی ٹی آئی کے منشور کا حصہ تھا جو آج مکمل ہوا۔