سائفر کیس: عمران خان کے جوڈیشل ریمانڈ میں توسیع

اٹک: سیکرٹ ایکٹ عدالت نے سائفر کیس میں پاکستان تحریک انصاف (پی ٹی آئی) کے چیئرمین عمران خان کے جوڈیشل ریمانڈ میں بدھ کو توسیع کردی۔

تفصیلات کے مطابق عمران خان کے خلاف سائفر کیس کی سماعت اٹک جیل میں کیمرہ میں ہوئی، خصوصی عدالت کے جج ابوالحسنات ذوالقرنین نے 14 روزہ جوڈیشل ریمانڈ مکمل ہونے پر سابق وزیراعظم عمران خان کے خلاف آفیشل سیکرٹ ایکٹ کے تحت کیس کی سماعت کی۔

احتساب عدالت کے جج ابوالحسنات ذوالقرنین نے سائفر کیس میں پی ٹی آئی کے سربراہ کے جوڈیشل ریمانڈ میں 26 ستمبر تک توسیع کردی۔

عمران خان کے خلاف کیس کی سماعت کے فوری بعد خصوصی عدالت کے جج ابوالحسنات اسلام آباد روانہ ہوگئے جہاں انہوں نے پی ٹی آئی کے وائس چیئرمین شاہ محمود قریشی کے خلاف سائفر کیس کی بھی سماعت کی۔

واضح رہے کہ عمران خان اور شاہ محمود قریشی سائفر گمشدگی کیس میں زیر حراست ہیں۔