احتساب کانظام فعال جمہوریت کے لئے ضروری ہے،وزیراعظم

اسلام آباد: نگران وزیراعظم انوارالحق کاکڑ نے کہاہے کہ احتساب کانظام فعال جمہوریت کے لئے ضروری ہے تاکہ عوامی عہدیداروں پرنظررکھی جاسکے لیکن احتساب کے عمل کے ذریعے نظام کو مفلوج نہیں کیا جاناچاہیے۔

نجی نیوزچینل کے ساتھ ایک انٹرویومیں انہوں نے احتساب کے نظام کے مختلف پہلوئوں کو مربوط بنانے اوراختیارات کے استعمال کی وضاحت پر زور دیا۔ سابق پارلیمنٹ کی طرف سے کی گئی نیب قوانین میں ترامیم اورسپریم کورٹ کی طرف سے انہیں کالعدم قراردیئے جانے کے حوالے سے انہوںنے کہا کہ حکومت وزارت قانو ن کی سفارشات کی بنیاد پر اس کے بارے میں مستقبل کے لائحہ عمل کافیصلہ کرے گی۔

بجلی چوری کی روک تھام اورسمگلنگ کے خلاف کارروائی کے با رے میں وزیراعظم نے کہاکہ اس سلسلے میں صوبوں کے تعاون سے ایک جامع حکمت عملی اختیار کی جارہی ہے اوراس کے مثبت نتائج سامنے آرہے ہیں۔

انہوں نے کہاکہ بجلی چوروں کے خلاف کارروائی کے علاوہ بجلی واجبات کی عدم ادائیگی کامسئلہ بھی جاری مہم کے تحت حل کیاجائے گا۔انوارالحق کاکڑ نے کہاکہ حکومت توانائی کے شعبے میں موثراقدامات کررہی ہے تاکہ بجلی کے بلوں کی ادائیگی صارفین کے لئے ناقابل برداشت نہ بن جائے۔