او آئی سی کشمیریوں کے حق خود ارادیت کیلئے حل کیلئے آواز اٹھاتی رہے گی،نسیمہ بگلی

جنیوا: جنیوا میں اقوام متحدہ کے دفتر میں اسلامی تعاون تنظیم (او آئی سی) کی مستقل نمائندہ نسیمہ بگلی نے حق خود ارادیت کی جدوجہد میں کشمیریوں کی حمایت کا اعاد ہ کرتے ہوئے کہا کہ تنظیم اس حوالے سے اپنی آواز بلند کرتی رہے گی۔

کشمیر میڈیاسروس کے مطابق نسیمہ بگلی نے ان خیالات کا اظہار جینوا میں اقوام متحدہ کی انسانی حقوق کونسل کے54ویں اجلاس میں شرکت کے لیے موجود کشمیری وفد کے ساتھ گفتگو کے دوران کیا۔ انہوں نے کہا کہ او آئی سی کشمیر کاز کی حمایت جاری رکھی گی اور اس مسئلے کے حوالے سے بیداری پید اکرنے کیلئے اپنی تمام کوششیں برائے کار لائے گی۔

انہوں نے کہا کہ او آئی سی کے مستقل انسانی حقوق کمیشن کو مقبوضہ جموں وکشمیر میں انسانی حقوق کی خلاف ورزیوں کو دستاویزی شکل دینے اور اس حوالے سے رپورٹ جاری کرنے کا مینڈیٹ ملا ہے۔انہوں نے کہا کہ کمیشن اس سلسلے میں اپنا کام بخوبی انجام دیتا رہے گا۔ کشمیری وفد کی قیادت الطاف حسین وانی کر رہے تھے۔ انہوں نے نسیمہ بگلی کو بھارت کے غیر قانونی زیر قبضہ جموںوکشمیر کی تازہ ترین سیاسی اور انسانی حقوق کی صورتحال سے آگاہ کیا۔

انہوں نے مقبوضہ علاقے میں جاری خونریزی اور ریاستی دہشت گردی کے فوری خاتمے کے لیے او آئی سی تنظیم کے فعال کردار کی ضرورت پر زور دیتے ہوئے کہا کہ اب وقت آگیا ہے کہ او آئی سی علاقے میں انسانی حقوق کی مخدوش صورتحال کی بہتری کے لیے عملی اقدامات کرے۔

کشمیری نمائندوں نے کشمیریوں کی حق خودارادیت کی جائز جدوجہد کی مسلسل حمایت پر او آئی سی اور تنظیم کے رکن ممالک کا شکریہ ادا کیا۔وفد میں شامل دیگر افراد میں سید فیض نقشبندی، شمیم شال، سردار امجد یوسف، حسن بنا اور ایڈووکیٹ پرویز احمد شاہ شامل تھے۔