ایران کا اسرائیل و امریکہ کے خلاف ’فتح خیبر‘ آپریشن شروع، قطر اور بحرین پرمیزائل حملے

تہران: ایران نے جوابی کارروائی کرتے ہوئے اسرائیل و امریکہ کے خلاف’ فتح خیبر ‘کے نام سے آپریشن شروع کر دیا، بیلسٹک میزائلوں سے حملہ کیا، پورے اسرائیل میں سائرن بج گئے، اسرائیل کے شمالی علاقے حفیضہ میں دھماکوں کی آوازیں سنی گئیں،جبکہ قطر اور بحرین میں موجود امریکی بیسز کو بھی نشانہ بنایا گیا ہے۔

عرب میڈیا کے رپورٹس مطابق شمالی اسرائیل دھماکوں سے گونج اٹھا ہے، ایران نے وسیع پیمانے پر ڈرون اور میزائل چلائے، اسرائیل کا دارالحکومت تل ابیب دھماکوں سے گونج اٹھا ہے۔

جبکہ ایران نے قطر اور بحرین میںموجود امریکی بیسز کو بھی میزائل سے نشانہ بنایا ہے جس کے بعد قطر میں امریکی سفارتخانےکے اہلکاروں کو شیلٹر میں جانےکی ہدایت کر دی گئی ہے اور امریکی سفارت خانے کی جانب سے کہا گیا ہے کہ اگلے حکم تک شیلٹر میں رہیں۔

رپورٹس کے مطابق ایرانی قومی سلامتی کمیٹی کے سربراہ نے کہا ہے کہ ہم نے امریکا کو خبردار کیا تھا، آپ نے ایسا عمل شروع کردیا جس کا خاتمہ اب آپ کےاختیارمیں نہیں۔

خیال رہے کہ اس سے قبل ایرانی میڈیا کے مطابق امریکا، اسرائیل نے ایران کے 30 مقامات کو نشانہ بنایا، ابتدائی حملہ آیت اللہ علی خامنہ ای کے دفتر پر کیا گیا، تہران کے کئی علاقوں میں دھماکے ہوئے ہیں، تہران کی یونیورسٹی اسٹریٹ میں متعدد میزائل گرے، فوجی مراکز اور مقامات پر حملوں کے بعد پاسداران انقلاب کے ہزاروں ارکان ہلاک یا زخمی ہوئے ہیں۔