اے ایف سی چیمپیئنز لیگ میں سعودی فٹبال کلب کا ایرانی فٹبال کلب کے ساتھ میچ منسوخ

ایران کے شہر اصفہان میں جاری اے ایف سی چیمپیئنز لیگ میں سعودی فٹبال کلب الاتحاد کا ایرانی فٹبال کلب سباھان کے ساتھ میچ منسوخ کر دیا گیا ہے۔

میچ اس وقت باقاعدہ طور پر منسوخ ہوا جب سعودی کھلاڑیوں اور حکام نے سٹیڈیم میں قاسم سلیمانی کے مجسمے دیکھ کر میدان میں اترنے سے انکار کر دیا۔قاسم سلیمانی ایران کے پاسدارانِ انقلاب کی قدس فورس کے سربراہ تھے اور جنوری 2020 میں امریکی ڈرون حملے میں ہلاک ہو گئے تھے۔

سعودی فٹبال ٹیم کا گروپ سی کا دوسرا میچ پیر کی شام سات بجے ہونا تھا لیکن سعودی کھلاڑیوں نے عندیہ دیا کہ جب تک مجسمہ ہٹایا نہیں جاتے وہ میچ نہیں کھیلیں گے۔ صورت حال کا جائزہ لینے کے لیے ڈیڑھ گھنٹے کا وقت لینے کے بعد سعودی وفد نے فوری طور پر گراؤنڈ چھوڑ دیا اور وہ وطن واپس جانے کے لیے ایئرپورٹ روانہ ہو گئے۔

NEW -- #Saudi football team @ittihad were meant to play Isfahan in #Iran tonight -- but organizers placed a bust of Qassem #Soleimani at the entrance, where the players would run out onto the pitch.

Ittihad have left the stadium in protest, refusing to play. pic.twitter.com/tgqUAaqDbO

— Charles Lister (@Charles_Lister) October 2, 2023

اے ایف سی کے مطابق چیمپیئنز لیگ 2023/24 میں سعودی الاتحاد فٹبال کلب اور ایرانی سباھان فٹبال کلب کا اصفہان کے نقشِ جہاں سٹیڈیم میں گروپ سی کا میچ غیرمتوقع حالات کی وجہ سے منسوخ ہو گیا ہے۔

اے ایف سی کھلاڑیوں، میچ کے متعلق دیگر عملے اور تمام سٹیک ہولڈرز کی سلامتی اور تحفظ کے عزم کو دہراتا ہے، اب یہ معاملہ متعلقہ کمیٹیوں کو بھیجا جائے گا۔