ضلعی انتظامیہ لاہور اور ٹرانسپورٹرز کی ملاقات میں کرایوں میں کمی پر اتفاق

پٹرولیم مصنوعات کی قیمتوں میں کمی کے ریلیف کو عوام تک منتقلی کا آغاز کردیا گیا۔ضلعی انتظامیہ لاہور اور ٹرانسپورٹرز کی ملاقات میں کرایوں میں کمی پر اتفاق ہو گیا۔ انٹر سٹی اے سی، نان اے سی کے کرایوں میں فوری 15 فیصد کمی کی جائے گی جبکہ گڈز ٹرانسپورٹرز کرایوں میں 10 فیصد کمی کریں گے۔

ضلعی انتظامیہ کے موٹر ٹرانسپورٹ فیڈریشن کے عہدے داروں سے مذاکرات کامیاب ہوگئے۔ موٹر ٹرانسپورٹ فیڈریشن ٹرانسپورٹ کے کرایوں میں 10 فیصد تک کمی کرے گی، پرائیویٹ اڈوں سے چلنے والی ٹرانسپورٹ کے کرایوں میں بھی 10 فی صد فیصد تک کمی کی جائے گی۔

ڈی سی لاہور رافعہ حیدر نے کہا کہ موٹر ٹرانسپورٹ فیڈریشن نے کرایوں میں فوری کمی پر رضامندی ظاہر کی ہے، تیل کی قیمتیں گرنے سے اشیائے ضروریہ کی نقل و حمل کے اخراجات میں بھی کمی آئے گی۔ بس اڈوں پر پہلے اور موجودہ کرایہ ناموں کی واضع تشہیرکی جائے گی۔

انہوں نے زور دیا کہ پٹرولیم مصنوعات سستی ہونے پر کاروباری افراد دیگر مصنوعات کی قیمتوں میں بھی کمی لائیں، وزیر اعلی پنجاب کی ہدایت کے مطابق عوام تک ہر ممکن ریلیف پہنچانے کے لیے کوشاں ہیں۔