ملک میں زراعت اور دوسرے شعبوں میں سرمایہ کاری بڑھائی جائے ،صدر مملکت

صدر ڈاکٹر عارف علوی نے ملک میں زراعت اور دوسرے شعبوں میں سرمایہ کاری بڑھانے کیلئے مشترکہ منصوبوں پر زور دیا ہے۔

 کراچی میں رائس ایکسپورٹ ایسوسی ایشن کے زیر اہتمام ایکسپورٹ ٹرافی تقریب سے خطاب کرتے ہوئے انہوں نے معیشت کو فروغ دینے کی غرض سے زرعی پیداوار اور زرعی برآمدات کو بڑھانے کیلئے قدر میں اضافے اور تحقیق پر توجہ مرکوز کرنے پر زور دیا۔

صدر نے ملک کو درست سمت میں گامزن کرنے کیلئے اور کاروباری برادری سمیت معاشرے کے تمام شعبوں کی فیصلہ سازی کے عمل میں شرکت پر زور دیا۔

اس موقع پر خطاب کرتے ہوئے سندھ کے گورنر کامران خان ٹیسوری نے قومی معیشت کو بہتر بنانے کیلئے برآمدات بڑھانے کی ضرورت پر زور دیا۔

کامران خان ٹیسوری نے مسرت کا اظہار کیا کہ چاول کی برآمد کا شعبہ دوسرا بڑا برآمدی شعبہ ہے جو قومی معیشت میں اہم کردار ادا کررہاہے۔

انہوں نے چاول کی برآمدات بڑھانے کیلئے ہر ممکن تعاون کا یقین دلایا۔