اقوام متحدہ کو غزہ میں بمباری روکنے اور انسانی بنیادوں پر کراسنگ کھولنے پر زور دینا چاہئے، ترجمان دفتر خارجہ

ترجمان دفتر خارجہ نے کہا ہے کہ اقوام متحدہ کو غزہ میں محاصرے کے خاتمہ، بمباری روکنے اور انسانی بنیادوں پر کراسنگ کھولنے پر زور دینا چاہئے، پاکستان تو فلسطین کی صورتحال پر تشویش ہے۔

ممتاز زہرہ بلوچ کا کہنا تھا کہ نگران وزیر اعظم انوار الحق کاکڑ اقتصادی تعاون تنظیم (ای سی او) کے سربراہ اجلاس میں شرکت کے لئے ازبکستان کا دورہ کریں گے۔ وزیر اعظم 8 اور9 نومبر کو ازبکستان کے دارالحکومت تاشقند میں اقتصادی تعاون تنظیم کے سربراہ اجلاس میں شریک ہوں گے۔

ترجمان دفتر خارجہ نے کہا کہ وزیر اعظم اجلاس میں شرکت کرنے والے رکن ممالک کے سربراہان سے بھی ملاقاتیں کریں گے۔  فلسطین کے حوالے سے بات کرتے ہوئے کہا کہ پاکستان کو فلسطین کی صورتحال پر تشویش ہے۔

ممتاز زہرہ بلوچ کا کہنا تھا کہ اسرائیل کی قابض افواج فلسطین میں جنگی جرائم کا ارتکاب کررہی ہیں، گزشتہ روز سینیٹ اجلاس میں فلسطینیوں پر ہونے والے مظالم کے خلاف قرارداد منظور کی گئی، اقوام متحدہ کو غزہ میں محاصرے کے خاتمہ، بمباری روکنے اور انسانی بنیادوں پر کراسنگ کھولنے پر زور دینا چاہئے۔