پاکستان کو فلسطین کی صورت حال پر گہری تشویش ہے ،ممتاز زہرہ بلوچ

پاکستان نے مقبوضہ فلسطین کی سنگین صورتحال پر گہری تشویش کا اظہار کرتے ہوئے کہا ہے کہ اسرائیل کی مسلسل اور اندھا دھند بمباری، غزہ کا غیر انسانی محاصرہ اور شہری اہداف بشمول پناہ گزین کیمپوں، ہسپتالوں اور رہائشی عمارتوں پر جان بوجھ کر حملوں نے ایک ناقابل قبول انسانی صورتحال پیدا کردی ہے۔

دفتر خارجہ کی ترجمان ممتاز زہرہ بلوچ نے جمعرات کو پریس بریفنگ میں کہا کہ گزشتہ 3 ہفتوں سے فلسطینیوں کا قتل عام جاری ہے جس میں 8ہزار سے زائد شہری مارے جاچکے ہیں جن میں 70 فیصد خواتین اور بچے ہیں، یہ جنگی جرائم اسرائیلی قابض افواج مکمل استثنیٰ کے ساتھ کررہے ہیں کیونکہ عالمی برادری فلسطینی عوام کی توقعات پر پورا اترنے میں مسلسل ناکام رہی ہے۔

انہوں نے کہا کہ گزشتہ روز سینیٹ آف پاکستان نے پاکستانی عوام کے جذبات کی ترجمانی کی اور مقبوضہ غزہ میں لوگوں کے خلاف اسرائیل کے انسانیت سوز جرائم کی شدید مذمت کی۔ سینیٹ نے فلسطینی عوام کے ساتھ مکمل یکجہتی اور حمایت کا بھی اظہار کیا۔

ترجمان نے کہا کہ ہم عالمی برادری سے مطالبہ کرتے ہیں کہ وہ مقبوضہ فلسطین میں مظالم کے خاتمے کے لئے اپنا کردار ادا کرے، اقوام متحدہ کی جنرل اسمبلی کی گزشتہ ہفتے کی قرارداد فلسطین کی صورتحال پر بڑھتے ہوئے بین الاقوامی اتفاق رائے کی عکاسی کرتی ہے۔ انہوں نے کہا کہ ہم امید کرتے ہیں کہ یہ غزہ میں قتل عام کے جلد خاتمے کا باعث بنے گی۔

انہوں نے کہا کہ اقوام متحدہ کی سلامتی کونسل کو امن کے قیام کی اپنی ذمہ داری پوری کرنی چاہیے۔ اقوام متحدہ کو غزہ کا محاصرہ ختم کرنے، شہریوں کی حفاظت اور غزہ کے محصور لوگوں کے لئے بلا تعطل امدادی سامان کی فراہمی کے لئے انسانی ہمدردی کی راہداریوں میں سہولت فراہم کرنے کا مطالبہ کرنا چاہئے۔