دھند کے باعث موٹروے ایم ون پشاور سے برھان تک مرحلہ وار بند کر دی گئی

اسلام آباد: نیشنل ہائی ویز اینڈ موٹر ویز پولیس نے شدید دھند اورحد نگاہ انتہائی کم ہونے کی وجہ سے موٹروے ایم ون کو پشاور سے برھان تک مرحلہ وار بند کر دیا۔

ترجمان موٹروے پولیس نارتھ زون کی طرف سے جاری بیان کے مطابق موٹروے بند کرنے کا مقصد حادثات سے بچاؤ اور موٹروے استعمال کرنے والوں کے جان و مال کا تحفظ ہے ۔ شہریوں سے درخواست ہے کہ دھند کے اوقات میں غیر ضروری سفر سے گریز کریں۔

اپنا سفر دن کی روشنی میں مکمل کر کے دھند کے آغاز سے پہلے اپنی منزل مقصود تک پہنچ جائیں۔

گاڑیوں میں فوگ لائٹس کا استعمال کریں۔تیز رفتاری سے پرہیز کریں اور اگلی گاڑی سے مناسب فاصلہ معمول سے زیادہ رکھیں۔ سفر شروع کرنے سے پہلے دھند کے حوالے سے موٹر وے پولیس ہیلپ لائن 130 سے معلومات حاصل کی جا سکتی ہیں۔

اس کے علاوہ نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات حاصل کی جا سکتی ہیں۔دھند کی صورتحال بہتر ہونے پر موٹر وے کو ہر قسم کی ٹریفک کے لئے کھول دیا جائے گا۔