نگران حکومت پاکستان کے مختلف چیلنجزسے نمٹ رہی ہے ،انوار لحق کاکڑ

نگران وزیراعظم انوار الحق کاکڑ نے کہا ہے کہ عبوری حکومت اچھے نظم و نسق اور مثبت سمت کا ورثہ چھوڑ کر جائے گی۔

ایک نجی ٹی وی چینل سے گفتگو کرتے ہوئے انہوں نے کہا کہ نگران حکومت معیشت، نجکاری اور مواصلات سمیت مختلف شعبوں میں چیلنجز سے نمٹ رہی ہے۔

انہوں نے کہا کہ نگران حکومت کی ترجیحات میں سے ایک ایسا پروگرام ہے جس کے تحت دس سال میں دس لاکھ نرسوں کو تربیت دی جائے گی۔

وزیراعظم نے کہا کہ حکومت اپنے زیر انتظام اداروں کی نجکاری کا عمل تیز کر رہی ہے اور اس فہرست میں پی آئی اے ترجیح ہے۔غیر ملکی سرمایہ کاری راغب کرنے کے بارے میں انہوں نے کہا کہ خصوصی سرمایہ کاری سہولت کونسل کاروبار میں آسانی کا موقع فراہم کر رہی ہے۔

انہوں نے کہا کہ اگلے ہفتوں میں ملک میں اچھی خبریں آئیں گی اور زراعت، انفارمیشن ٹیکنالوجی اور کان کنی کے شعبوں میں اربوں ڈالر کی غیر ملکی سرمایہ کاری آئے گی۔انہوں نے کہا کہ ٹرانس افغان ریلوے ازبکستان کو پاکستان سے جوڑے گا اور کوئٹہ تفتان ریل نیٹ ورک کی بہتری کا کام بھی جاری ہے۔