پاکستان اور متحدہ عرب امارات کے اربوں ڈالر کی مفاہمتی یاداشتوں پر دستخط

وزیراعظم انوارالحق کاکڑ نے کہا ہے کہ پاکستان اور متحدہ عرب امارات نے آج(پیر کو) ابوظہبی میں اربوں ڈالر کے مفاہمتی یادداشتوں پر دستخط کئے۔

انہوں نے آج ابو ظہبی سے ایک خصوصی ویڈیو پیغام میں مفاہمت کی یادداشتوں پر دستخط کرنے پر دونوں ملکوں کے عوام کو مبارکباد دی۔

انہوں نے کہا کہ ان ایم او یوز سے اقتصادی تعاون ، علاقائی استحکام اور سٹرٹیجک تعاون کا نیاباب شروع ہوگا۔

وزیر اعظم نے کہا کہ ان ایم او یوز سے اقتصادی فوائد مختلف ٹھوس منصوبوں کی صورت میں جلد دیکھے جائیں گے۔انہوں نے کہا کہ دونوں ملکوں کے درمیان دوستی جس کی بنیاد ستر کی دہائی میں شیخ زید نے رکھی تھی کو اب ان کے فرزند محمد بن زید النہیان نے نئے باب میں داخل کیا ہے۔

بری فوج کے سربراہ جنرل سید عاصم منیر اور دونوں ملکوں کے وزرا بھی مفاہمتی یادداشتوں پر دستخط کی تقریب میں موجود تھے۔