عمران خان پی ٹی آئی کے چیئرمین تھے، ہیں اور وہی رہیں گے، نامزد پارٹی چیئرمین

پاکستان تحریک انصاف کے نامزد چیئرمین بیرسٹر گوہر علی نے کہا ہے کہ عمران خان پی ٹی آئی کے چیئرمین تھے، ہیں اور وہی رہیں گے انشاءاللّٰہ، میں اپنی ذمہ داری تب تک نبھاؤں گا جب تک خان صاحب واپس نہیں آجاتے۔

میڈیا سے گفتگو کرتے ہوئے گوہر علی کا کہنا تھا کہ میرے پاس الفاظ نہیں ہیں، عمران خان نے مجھ پر میرے ضلع پر، خیبرپختونخوا پر اور ہماری ٹیم پر جو اعتماد کیا اس کو بیان نہیں کر سکتا۔

عمران خان پاکستان تحریک انصاف کے چیئرمین تھے، ہیں اور وہی رہیں گے انشاءاللّٰہ - میں اپنی ذمہ داری تب تک نبھاؤں گا جب تک خان صاحب واپس نہیں آجاتے۔۔۔ بیرسٹر گوہر علی @BarristerGohar #قومی_لیڈر_کو_رہا_کرو pic.twitter.com/Bimjvjw9KM

— PTI (@PTIofficial) November 29, 2023

نامزد چیئرمین پی ٹی آئی کا کہنا تھا کہ میں عمران خان کا جانشین کے طور پر فرائض انجام دوں گا، پی ٹی آئی وہی ہے جو عمران خان کی ہے، عمران خان ہمارے لیڈر ہیں چاہے وہ جیل کے اندر ہیں چاہے جیل کے باہر ہوں۔ 

انہوں نے کہا کہ عمران خان پارٹی چیئرمین تھے، ہیں اور تاحیات چیئرمین رہیں گے۔ یہ فیصلہ ہو چکا ہے، میں اس وقت تک اپنی ذمہ داریاں نبھاؤں گا جب تک عمران خان باعزت طور پر واپس اپنی سیٹ پر نہیں آتے اور وہ دن دور نہیں جب وہ واپس آئیں گے۔