شہباز شریف کو بیرون ملک جانے کی اجازت ، وزارت داخلہ نےلاہورہائیکورٹ کا فیصلہ چیلنج کردیا

تفصیلات کے مطابق و زارت داخلہ کی اپیل میں شہباز شریف کو فریق بنایا گیا ہے اور کہا گیا ہے کہ شہباز شریف کا نام پی این آئی ایل میں تھا، لاہورہائیکورٹ نے نوٹس جاری کیے بغیر حتمی ریلیف فراہم کر دیا۔ وفاق کی جانب سے دائر درخواست میں استدعا کی گئی ہے کہ شہباز شریف کا نام بلیک لسٹ سے نکالنے کا لاہور ہائیکورٹ کا حکم کالعدم قرار دیا جائے، ان کے بیرون ملک جانے کی اجازت دینے کا یکطرفہ فیصلہ نہیں دیا جا سکتا۔

 درخواست میں وفاق کا کہنا ہے کہ نوٹس کے بغیر لاہور ہائیکورٹ کا بیرون ملک اجازت دینے کا جواز نہیں تھا، شہباز شریف کو بیرون ملک جانے کی اجازت دینے کی درخواست پر اسی روز فیصلہ سنا دیا گیا۔لاہور ہائیکورٹ نےقانونی اصولوں کے برعکس فیصلہ سنایا، کیونکہ متعلقہ حکام سے جواب مانگا نہ کوئی رپورٹ لہذا عدالت کا یہ فیصلہ کالعدم قرار دیا جائے ۔

اس حوالے سے وزارت داخلہ نے شہبازشریف کا نام ایگزٹ کنٹرول لسٹ (ای سی ایل) میں ڈالنے کا نوٹی فکیشن جاری کردیا ہے، نوٹی فکیشن کے مطابق شہباز شریف آج سے بیرون ملک سفر کرنے کے مجاز نہیں رہے، ان کا نام ای سی ایل پر ڈالنے کی وجوہات بھی نوٹی فکیشن میں درج کی گئی ہیں۔

دوسری جانب شہباز شریف نے ای سی ایل  سے نام  نکلوانے کیلئے لاہور ہائیکورٹ سے رجوع کا فیصلہ کیا ہے ،ذرائع کے مطابق  شہباز شریف لاہور ہائیکورٹ میں درخواست دائر کریں گے ۔ درخواست میں شہباز شریف کا نام ای سی ایل میں ڈالنے کا اقدام چیلنج کیا جائے گا۔

یاد رہے لاہور ہائی کورٹ نے طبی بنیادوں پر شہباز شریف کو بیرون ملک جانے کی مشروط  اجازت دی تھی۔