عیدکے ایام میں لاک ڈاؤن کے ثمرات، خیبرپختونخوا میں کوروناکیسز میں نمایاں کمی

جی این این کے مطابق خیبرپختونخوا میں 24 گھنٹوں میں مجموعی طور پر مثبت کورونا کیسز کی شرح 6.8فیصد رہی۔ محکمہ صحت خیبرپختونخوا  کے مطابق صوبے میں ایکٹیو کیسز کی تعدادکم ہوکر 7ہزار824 رہ گئے،  جبکہ پشاور میں 953 ایکٹیو کیسز موجودہیں ۔ صوبائی دارالحکومت میں کورونا کے مثبت کیسز کی شرح 10 فیصد ہے، مردان میں مثبت کورونا کیسز کی شرح 16 فیصد ،ہری پور میں مثبت کیسز کی شرح 18 فیصد ہے۔

رپورٹ کے مطابق صوبائی دارالحکومت کے تین بڑے ہسپتالوں میں کورونا کے مریضوں میں واضح کمی آئی،  تینوں بڑے ہسپتالوں میں مجموعی طورپر کورونا کے 432مریض داخل، 45مریض وینٹی لیٹرز پر ہیں۔ ترجمان ایل آر ایچ کے مطابق لیڈی ریڈنگ ہسپتال میں کورونا کے 209مریض زیر علاج، 19وینٹی لیٹرز پرہیں، ترجمان کے ٹی ایچ کے مطابق  خیبر ٹیچنگ ہسپتال میں کورونا کے 86مریض داخل، وینٹی لیٹرپر کوئی مریض نہیں، جبکہ حیات آباد میڈیکل کمپلیکس میں کورونا کے 137 مریض داخل، 26وینٹی لیٹرز پر ہیں۔

واضح رہے کہ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید74فراد چل بسے ۔ ملک میں  اموات کی مجموعی تعداد 19 ہزار617ہوگئی ہے،جبکہ  متاثرہ افراد کی مجموعی تعداد 8 لاکھ 80ہزار 362ہو گئی ہے ۔ گزشتہ 24 گھنٹوں میں مثبت کیسز کی شرح 8.80 فیصد رہی۔