انوارلحق کاکڑ کی پشاور دھماکے کی شدید مذمت

نگران وزیر اعظم انوار الحق کاکڑ نے دہشت گردی کے خلاف پاکستان کے عزم کا اعادہ کرتے ہوئے کہا ہے کہ ملک سے اس ناسور کے مکمل خاتمے کیلئے کوششیں جاری رہیں گی۔

انہوں نے ایک بیان میں آج (منگل) صبح پشاور میں وارسک روڈ پر ہونے والے دھماکے کی شدید مذمت کی جس میں چار بچوں سمیت پانچ افراد زخمی ہوگئے۔ وزیر اعظم نے کہا کہ دہشت گردوں کو پاکستان کا امن تباہ کرنے نہیں دیا جائے گا اور واقعے میں ملوث افراد کی نشاندہی کرکے انہیں انصاف کے کٹہرے میں لایا جائے گا۔

نگران وزیراعظم نے متعلقہ حکام کو دھماکے میں زخمی ہونے والے بچوں کو بہترین طبی سہولیات فراہم کرنے کی ہدایت کی انہوں نے زخمیوں کی جلد صحت یابی کی بھی دعا کی۔ انہوں نے قانون نافذ کرنے والے اداروں کو واقعے کی تحقیقات جلد مکمل کرنے کی ہدایت کی۔ لیڈی ریڈنگ ہسپتال کے ترجمان کے مطابق دو زخمی بچوں کی حالت تشویشناک ہے۔دھماکے کی نوعیت کا تعین کیا جائے گا۔