فلسطین جنگ کا تعلق انسانی حقوق اور مسلم دنیا کے مسائل سے ہے،طاہر اشرفی

بین المذاہب ہم آہنگی اور مشرقِ وسطیٰ کے امور کیلئے وزیراعظم کے نمائندہ خصوصی حافظ طاہر محمود اشرفی نے کہا ہے کہ انیس سو سڑسٹھ سے پہلے کی سرحدوں کی بنیاد پر ایک خود مختار فلسطینی ریاست قائم کی جانی چاہئے جس کا دارالحکومت القدس الشریف ہو۔

انہوں نے آج(اتوار) کو اسلام آباد میں ایک نیوز کانفرنس سے خطاب کرتے ہوئے کہا کشمیر اور فلسطین کے تنازعات کا براہِ راست تعلق انسانی حقوق اور مسلم دنیا کے مسائل سے ہے۔

مسئلہ فلسطین پر پاکستان کا موقف بیان کرتے ہوئے طاہر اشرفی نے کہا پاکستان کے اسرائیل سے کوئی سفارتی تعلقات نہیں ہیں اور ہم پورے یقین اور پختہ عزم کے ساتھ فلسطین کے معصوم عوام کے ساتھ کھڑے ہیں۔

انہوں نے کہا پاکستان نے معیشت کے بارے میں متحدہ عرب امارات، کویت اور سعودی عرب کے ساتھ اہم معاہدے کئے ہیں جو ان ممالک کے پاکستان پر اعتماد کا ثبوت ہے۔