لندن میں دم دبا کر بھاگنے والوں کو واپس لائیں گے ،وزیراعظم

وزیر اعظم عمران خان نے  تقریب سے خطاب کرتے ہوئے کہا ہے کہ  پاکستان بہت بڑے خواب کانام تھا، میری عمر پاکستان کی عمر کے برابر ہے،کبھی کسی نے پاکستان کے خواب کی وضاحت نہیں دی، گزشتہ ادوار میں کسی نے غریبوں کیلئے کچھ نہیں  کیا۔انہوں نے کہا کہ  مدینہ کی ریاست پر اللہ تعالیٰ نے  سب سے زیادہ نعمتیں بخشی تھیں،  مدینہ کی ریاست میں  تاریخ کا سب سے بڑا انقلاب آیا تھا، نبی کریم ﷺکی زندگی ہمارے لئے مشعل راہ ہے۔

وزیراعظم عمران خان نے کہا کہ  سارے مافیا ز مل کرمجھ سے این آراو لینے کی کوشش کررہے ہیں، کسی صورت مافیا کواین آراو نہیں دوں گا، امیر کیلئے این آر او ملک کی تباہی کا سبب بنا ،میں نے ان کو این آر او کسی قیمت پر نہیں دینا،سارے مافیا اکٹھے ہوکر این آر او لینے کی کوشش کر رہے ہیں ،میں مافیاکوقانون کے نیچے لیکرآؤں گا ،این آر او نہیں دوں گا۔

وزیراعظم کا کہنا تھا کہ  خیبر پختونخوا  میں انسانوں  پر سرمایہ کاری کی گئی ہے، 2013کے بعدخیبر پختونخوامیں غربت میں کمی آئی ہے۔وزیر اعظم نے سوال کیا کہ  کہاں ہیں وہ سیاست دان جودم دبا کر بھاگے ہوئے ہیں؟

کہتے تھے کہاں ہے نیاخیبرپختونخوا، ان کوپتا ہی نہیں تھا  کتنا بڑا انقلاب آرہا ہے،خیبرپختونخوا میں سب کے پاس ہیلتھ کارڈ ہے۔

وزیراعظم عمران خان نے کہا کہ  خیبرپختونخواکسی کودوسری بار موقع نہیں دیتا،آپ کےلوگوں نے کیوں دوسری بار منتخب کیا؟ لندن میں دم دبا کر بھاگنے والوں کو واپس لائیں گے،فکر نہ کریں،پنجاب کے بڑے سیاستدان آج لندن میں بیٹھے ہوئے ہیں۔

وزیراعظم نے تقریب سے خطاب کرتے ہوئے کہا کہ  پاکستان میں 50سال بعد ڈیم بن رہے ہیں ، مہمند ڈیم کے ذریعے سستی بجلی ملے گی ، کورونا کے باوجود مہمند ڈیم پر کام جاری ہے ،مہمند ڈیم 2025 تک مکمل ہو جائے گا ، پشاور کیلئے300ملین گیلن پانی آجائے گا ،2028تک پاکستان میں 10ڈیم بنیں گے۔