حوثی جنگجوؤں کا بحیرۂ احمرمیں روسی اور چینی جہازوں کو محفوظ راستہ دینے کا وعدہ

یمن کے ایرانی حمایت یافتہ حوثی جنگجوؤں نے روس اور چین سے وعدہ کیا ہے کہ ان کے تجارتی جہازوں کو بحیرہ احمر میں نشانہ نہیں بنایا جائے گا۔

غزہ میں جاری لڑائی کے دوران فلسطینیوں سے اظہارِ ہمدردی و یکجہتی کے لیے حوثی ملیشیا نے بحیرہ احمر میں امریکا سمیت متعدد ممالک کے آئل ٹینکرز اور دیگر تجارتی جہازوں کو راکٹوں اور میزائلوں سے نشانہ بنایا ہے۔

حوثی ملیشیا کے حملوں کے باعث متعدد بڑے کاروباری اداروں نے اپنے جہازوں کو بحیرہ احمر سے گزارنا چھوڑ دیا ہے۔ اس کے نتیجے میں دنیا بھر میں مال کی ترسیل متاثر ہوئی ہے۔ بعض ممالک میں توانائی کے بحران کو اس صورتِ حال نے مزید خطرناک بنادیا ہے۔

روسی خبر رساں ادارے ایزویسٹیا کے شائع کردہ ایک انٹرویو میں سینیئر حوثی اہلکار محمد البخیتی نےکہا ہے کہ نقل و حمل کے کچھ ادارے جاری جارحیت کی وجہ سے یمن کے ارد گرد کے جن پانیوں سے گریز کر رہے ہیں، وہ اس وقت تک محفوظ ہیں جب تک کہ بحری جہاز بعض ممالک بالخصوص اسرائیل سے منسلک نہ ہوں۔جہاں تک روس اور چین سمیت دیگر تمام ممالک کا تعلق ہے تو خطے میں ان کی جہاز رانی کو کوئی خطرہ نہیں ہے۔

حوثی ملیشیا کے رہنما کا کہنا تھا کہ روس، چین اور چند دوسرے ممالک کے جہازوں کو بحیرہ احمر میں کوئی خطرہ نہیں۔اسرائیل کی حمایت اور مدد کرنے والے ممالک کے جہازوں پر حملے جاری رہیں گے۔

حوثی ملیشیا کا کہنا ہے کہ چند خاص قومیتوں کے جہازوں کو نشانہ بنایا جارہا ہے تاہم ایک امریکی نیوی کمانڈر کا کہنا ہے کہ جن جہازوں کو راکٹوں اور میزائلوں سے نشانہ بنایا گیا ہے ان کا درجنوں ممالک سے تعلق ہے۔

امریکی فوج نے جمعرات کو ایک بار پھر یمن میں حوثی ملیشیا کو نشانہ بنایا۔ اس کے جواب میں حوثی جنگجوؤں نے آج (جمعہ کو) ایک امریکی جہاز پر حملہ کیا ہے۔