بین الاقوامی تعاون کے ذریعے ہی عالمی چیلنجز سے نمٹا جا سکتا ہے ،پاکستان

پاکستان ایڈیشنل سیکرٹری خارجہ ایمبسڈر سید حیدر شاہ نے کہا کہ موثر بین الاقوامی تعاون کے ذریعے ہی کثیر جہتی عالمی چیلنجز پر قابوپایا جاسکتا ہے۔

یوگنڈا کے دارالحکومت کمپالا میں غیروابستہ تحریک کے انیسویں اجلاس کے موقع پر اقوام متحدہ کیلئے ایڈیشنل سیکرٹری خارجہ ایمبسڈر سید حیدر شاہ نے پاکستان کا قومی موقف پیش کرتے ہوئے غیروابستہ تحریک اوراس کے بنیادی اصولوں اور امن، مساوات ، تعاون اور سب کی بھلائی کیلئے تحریک کی کوششوں کی حمایت جاری رکھنے کیلئے پختہ عزم کااظہار کیا۔

انہوں نے خصوصاً ترقی پذیر ملکوں میں متوازن اور پائیدار سماجی ومعاشی ترقی یقینی بنانے کیلئے خزانہ، تجارت اور ٹیکنالوجی کے نظام میں اصلاحات کیلئے فوری اقدامات کرنے کا عندیہ دیا ۔ 

ایڈیشنل سیکرٹری خارجہ نے اقوام متحدہ کی سلامتی کونسل کی قراردادوں اورکشمیری عوام کی امنگوں کے مطابق تنازعہ جموں وکشمیر کے فوری حل کی بھی درخواست کی ۔ 

حالیہ تبدیلیوں کے تناظر میں وزیرخارجہ جلیل عباس جیلانی کی جانب سے سرکاری دورے کو مختصر کرنے کے بعد ایمبسڈر حیدرشاہ غیروابستہ تحریک کے اجلاس میں پاکستانی وفد کی قیادت کررہے ہیں۔