ملک آج سے مختلف علاقوں میں بارش اور برفباری کا امکان

اسلام آباد: محکمہ موسمیات نے خیبرپختونخوا کے میدانی علاقوں میں آج (ہفتہ) سے بارش کی پیشگوئی کی ہے۔

محکمہ موسمیات کے مطابق شہری علاقوں میں دھند میں کمی کا امکان ہے جبکہ بالائی اضلاع میں آج سے برفباری کا امکان ہے، محکمہ موسمیات کا کہنا ہے کہ بارش اور برفباری کا سلسلہ 31 جنوری تک وقفے وقفے سے جاری رہنے کا امکان ہے۔

پراونشل ڈیزاسٹر مینجمنٹ اتھارٹی (پی ڈی ایم اے) نے بارش اور برف باری کے پیش نظر ضلعی انتظامیہ کو احتیاطی تدابیر اختیار کرنے کی ہدایت کی ہے۔

دوسری جانب ملک بھر میں سردی کی لہر برقرار ہے۔ طویل خشک سالی کے بعد آج سے مغربی علاقوں میں بارش اور برف باری کی پیش گوئی کی گئی ہے۔

محکمہ موسمیات کے مطابق گلگت بلتستان، آزاد کشمیر اور خیبرپختونخوا کے اضلاع میں ہلکی بارش اور پہاڑوں پر برفباری کا امکان ہے جب کہ مری، اسلام آباد اور پوٹھوہار ریجن میں بھی بارش ہوگی۔