عدلیہ مخالف سوشل میڈیا مہم چلانے والوں کے خلاف تحقیقات جاری

اسلام آباد : اطلاعات و نشریات کے نگران وزیر مرتضیٰ سولنگی نے کہا ہے کہ مشترکہ تحقیقاتی ٹیم، سوشل میڈیا پر اعلی عدلیہ کے خلاف مذموم مہم کی قانون کے مطابق تحقیقات کررہی ہے۔

ایف آئی اے، پی ٹی اے اور دیگر متعلقہ اداروں کے حکام کے ساتھ ایک مشترکہ نیوز کانفرنس سے خطاب کرتے ہوئے نگران وزیر نے کہا کہ سوشل میڈیا پر عدلیہ مخالف مہم کی تحقیقات کے لئے اس ماہ کی سولہ تاریخ کو مشترکہ تحقیقاتی ٹیم بنائی گئی تھی۔ انہوں نے کہا اب تک چھ سو سوشل میڈیا اکاونٹس کی چھان بین کی گئی ۔

جبکہ ایک سو انکوائریاں رجسٹرڈ کی گئیں۔وزیر اطلاعات نے کہا ایک سو دس افراد کو نوٹس بھیجے گئے جن میں بتیس صحافی، بائیس سیاستدان اور سیاسی کارکن شامل ہیں۔

انہوں نے کہا کہ سوشل میڈیا  صارفین کے خلاف ہونے والی تحقیقات بالکل غیر جانبدار طریقے سے ہو رہی ہیں ۔