پی ٹی آئی رہنما حماد اظہر کا انتخابات سے دستبرداری کا اعلان

پاکستان تحریک انصاف (پی ٹی آئی) کے رہنما حماد اظہر نے عام انتخابات سے دستبرداری کا اعلان کردیا۔

حماد اظہر نے سوشل میڈیا پلیٹ فارم ایکس پر اپنے ٹویٹ میں کہا کہ میں نے سپریم کورٹ سے اپنے کاغذات نامزدگی غیر قانونی طور پر مسترد ہونے کی اپیل اس لئے واپس لی کے الیکشن سے صرف ہفتہ پہلے انتخابی نشان بدلنے کا نقصان ہو سکتا تھا۔ لاہور ہائی کورٹ کے ان جج صاحبان کا شکریہ جنہوں نے واضح قانون اور اپنے ہی فیصلوں کے برعکس میرے کاغذات منظور نہیں کئے۔

میں نے سپریم کورٹ سے اپنے کاغذات نامزدگی غیر قانونی طور پر مسترد ہونے کی اپیل اس لئے واپس لی کے الیکشن سے صرف ہفتہ پہلے انتخابی نشان بدلنے کا نقصان ہو سکتا تھا۔ لاہور ہائی کورٹ کے ان جج صاحبان کا شکریہ جنھوں نے واضح قانون اور اپنے ہی فیصلوں کے برعکس میرے کاغذات منظور نہیں کئے۔…

— Hammad Azhar (@Hammad_Azhar) January 31, 2024

انہوں نے مزید کہا کہ پورا ہفتہ فیصلے کی تحریر نہیں دی جس کی بنیاد پر سپریم کورٹ میں بروقت اپیل دائر ہو سکے۔ میرے والد الیکشن لڑ رہیں ہیں اور الحمدللہ ان کی کمپین بہت مضبوط ہے۔ میں انشاللہ ضمنی الیکشن میں اپنے قائد عمران خان کے ساتھ الیکشن لڑوں گا۔

واضع رہے کہ سپریم کورٹ میں جسٹس منصور علی شاہ اور جسٹس جمال مندوخیل نے حماد اظہرکے کاغذات نامزدگی مسترد ہونے سے متعلق کیس کی سماعت کی، جس میں معاون وکیل نے عدالت کو بتایا کہ حماد اظہر اپیل کی پیروی نہیں کرنا چاہتے۔

جسٹس منصور نے سوال کیا کہ ہائیکورٹ نے اپنے فیصلے میں 62 ون ایف کا حوالہ کیوں دیا ہے؟ سپریم کورٹ کا فیصلہ واضح ہے کہ آرٹیکل 62 ون ایف کا اطلاق ازخود نہیں ہوتا۔

وکیل درخواست گزار نے اپنے دلائل میں کہا کہ اشتہاری کی اہلیت کے حوالے سے سپریم کورت کا فیصلہ بھی آ چکا ہے جس پر جسٹس منصور علی شاہ نے ریمارکس دیئے کہ اپیل واپس لینے کی وجہ سے حماد اظہر کو فیصلے کا فائدہ نہیں ہو گا۔جسٹس جمال مندوخیل نے ریمارکس دیئے کہ لگتا ہے کہ حماد اظہر سرنڈر نہیں کرنا چاہتے۔