سندھ حکومت کا ارسا چیئرمین کو ہٹانے کا مطالبہ

تفصیلات کے مطابق  سندھ حکومت نے ارسا چیئرمین کو ہٹانے کا مطالبہ کردیا ہے۔وزیر اطلاعات نے مطالبہ کیا ہے کہ  پانی کا حق مانگنے پر ارسا چیئر مین نے سندھ کے ممبر پر تشدد کیا، اسےہٹایہ جائے۔

ناصر شاہ نے ارسا چیئرمین پر برہمی کا ظہار کرتے ہوئے کہا کہ ایک تو چوری اوپر سے سینا زوری، اب اینٹ کا جواب پتھر سے دیں گیں،  ارسا چیئرمین صوبوں کو پانی تقسیم کرنے میں ناکام ہوچکے ہیں، سندھ حکومت نے پانی چوری ہونے پر احتجاج کی دھمکی دی تو نالائق وزرا کی چیخیں آنا شروع ہوگئیں ہیں ۔

وزیر اطلاعات سندھ ناصر حسین شاہ کا کہنا تھا کہ  ارسا نے جان بوجھ کر تونسا، پنجند کینال کھول کر سندھ کے حصے کا پانی پنجاب کو دیا، ارسا چیئرمین اپنی حدود میں رہے اور سندھ کو اپنے حصے کا پانی فراہم کرے، سندھ کو پانی نہ ملنے کی وجہ سے سندھ کے کاشتکار سراپہ احتجاج ہیں۔

ناصر حسین شاہ نے مزید کہا کہ  وفاق ناانصافیاں بند کرے ہم کوئی خیرات نہیں مانگ رہے اپنا حق مانگ رہے ہیں،  کیا ارسا چیئرمین نے عمران خان کےکہنے پر سندھ کا پانی بند کیا ہے؟، یہ سب پی ٹی آئی حکومت کے کہنے پر سندھ کے ساتھ ظلم ہورہا ہے۔