اسسٹنٹ کمشنرپاکپتن پر تشدد کامقدمہ، نون لیگی ایم پی اے نوید علی گرفتار

تفصیلات کے مطابق لاہور ہائی کورٹ میں اسسٹنٹ کمشنر پاکپتن کو تھپڑ مارنے اور اغوا کرنے سے متعلق کیس کی سماعت ہوئی۔ جسٹس شہرام سرور نے ایم پی اے نوید علی کی عبوری ضمانت کی درخواست پر سماعت کی جبکہ ایم پی اے نوید علی اور ان کے والد احمد رانا عبوری ضمانت کی معیاد ختم ہونے پر عدالت میں پیش ہوئے۔ عدالت نے مسلم لیگ ن کے رکن صوبائی اسمبلی   نوید علی کی  درخواست  ضمانت مسترد  کر دی۔  ایڈیشنل آئی جی انویسٹی گیشن کی جانب سے رپورٹ عدالت میں پیش کی گئی۔ عدالت سے عبوری ضمانت مستردہونے پر پولیس نے ن لیگی ایم پی اے نوید علی کو گرفتار کر لیا۔

خیال رہے کہ گزشتہ برس نومبر میں اسسٹنٹ کمشنر  خاور بشیر نے لیٹ نائٹ شادی کی تقریب پر چھاپہ مارا اس تقریب میں ایم پی اے بھی موجود تھا۔اسسٹنٹ کمشنر سے تقریب بند کروانے پر جھگڑا ہوا، وکیل درخواست گزار کا کہنا تھا کہ اس نے اے سی کو تھپڑ نہیں مارا، سیاسی بنیادوں پر اس کے خلاف کار سرکار میں مداخلت کا مقدمہ درج کرلیا گیا ۔