چوہدری نثار علی خان نے رکن اسمبلی کا حلف اٹھا لیا

تفصیلات کے مطابق سابق وزیر داخلہ چوہدی نثار علی خان  نے حکومت بینچوں سے حلف لیا ہے۔قائم مقام اسپیکر  دوست محمد مزاری نے  چوہدری نثار سے حلف لیا۔ چوہدری نثار علی خان نے 2 سال 10 ماہ بعد پنجاب اسمبلی کے رکن کی حیثیت سے حلف اٹھا لیا۔

قائم مقام اسپیکر دوست محمد مزاری نے چوہدری نثار سے پوچھا کہ   چوہدری نثار صاحب آپ ایوان میں خطاب کریں ؟ جس پر چوہدری نثار نے جواب دیا کہ نہیں شکریہ  اور ایوان سے اٹھ کر واپس روانہ ہوگئے۔

جی این این کے مطابق چوہدری نثار علی خان نے ایوان میں جانے کے لئے حکومتی ارکان کے لابی  کا انتخاب کیا،  پنجاب اسمبلی میں حکومت اور  اپوزیشن ارکان کے لئے ایوان میں جانے کے لئے الگ الگ لابی مختص ہے۔چوہدری نثار علی خان اسپیکر چیمبر سے نکل حکومتی لابی سے ایوان کے اندر گئے تھے۔

قبل ازیں  پنجاب اسمبلی میں چوہدری نثار نے سیکریٹری پنجاب اسمبلی محمد خان بھٹی سے ملاقات کی تھی ،سیکریٹری پنجاب اسمبلی محمد خان بھٹی کی جانب سے انہیں کہا گیا کہ  آپ کے خلاف دائر پٹیشنز کا اسٹیٹس چیک کر لیا ہے، آپ حلف اٹھا سکتے ہیں، کوئی قانونی رکاوٹ نہیں ہے۔

دو  روز قبل بھی چوہدری نثار پنجاب اسمبلی پہنچے تھے لیکن وہ اس موقع پر حلف نہیں اٹھا سکے تھے۔چوہدری نثار  2018ء کے عام انتخابات میں پنجاب اسمبلی کے حلقے پی پی 10 راولپنڈی سے کامیاب ہوئے تھے لیکن انہوں نے اپنے عہدے کا حلف نہیں اٹھایا تھا۔