پاکستان تحریک انصاف کا انتخابات میں دھاندلی کیخلاف پرامن مظاہروں کا اعلان

پاکستان تحریک انصاف نے آر اوز کیخلاف پرامن مظاہروں کا اعلان کردیا ۔

سوشل میڈیا پلیٹ فارم ایکس پر اپنے پیغام میں بیرسٹر گوہر خان نے کہا کہ پاکستان کی عوام نے بانی چیئرمین کے ”غلامی نامنظور“ کے ویژن پر مکمل اعتماد کا اظہار کیا ہے، 8 فروری کو تمام تر مشکلات کے باوجود عوام گھروں سے نکلے لیکن ریٹرننگ افسران کے ذریعے انکا مینڈیٹ چُرانے اور نتائج کےساتھ چھیڑ چھاڑجمہوریت پر شب خون مارنے کی ناقابلِ قبول کوشش کی جارہی ہے۔

پاکستان کے عوام نے بانی چیئرمین جناب عمران خان کے
”غلامی نامنظور“ کے ویژن پر مکمل اعتماد کا اظہار کیا ہے اور 8 فروری کو تمام تر مشکلات کے باوجود گھروں سے نکل کر تحریک انصاف کو واضح اور شفاف مینڈیٹ سے نوازا ہے مگر عوام کے فیصلے کے سامنے سرِ تسلیم خم کرنے کی بجائے پھر سے ریٹرننگ…

— Barrister Gohar Khan (@BarristerGohar) February 11, 2024

انہوں نے کہا کہ ایسی کوئی بھی کوشش ملک کیلئےسود مند ثابت ہوگی نہ ہی عوام اپنےووٹ کی بےحرمتی گوارا کریں گے۔ تحریک انصاف کی واضح جیت کو شکست میں بدلنے والے ریٹرننگ افسران کیخلاف آج پرامن احتجاج کریں گے۔

انہوں نے کارکنان سے اپیل کی کہ  قومی پرچم اور پاکستان تحریک انصاف کے جھنڈوں کےساتھ پرامن طریقے سے احتجاج میں شامل ہوں، عوام کے مینڈیٹ کے تحفظ کیلئے پرامن احتجاج کا اپنا بنیادی آئینی، جمہوری اور سیاسی حق استعمال کریں۔ مرکز، پنجاب اور خیبرپختونخوا میں واضح اکثریت حاصل کرنے کےباعث حکومت سازی تحریک انصاف کا بنیادی دستوری و جمہوری حق ہے جبکہ پاکستان کا مفاد عوام کے مینڈیٹ کے مکمل احترام ہی میں پوشیدہ ہے۔