اینٹی کرپشن نے رنگ روڈ منصوبہ سے متعلق تمام ریکارڈ قبضے میں لے لیا

تفصیلات کے مطابق   وزیراعلیٰ پنجاب کے احکامات پراینٹی کرپشن کی خصوصی ٹیم راولپنڈی پہنچ گئی ہے، اینٹی کرپشن کی تشکیل کردہ خصوصی ٹیم نے کمشنر آفس کا دورہ کیا۔اینٹی کرپشن کی ٹیم نے رنگ روڈ منصوبہ سے متعلق تمام ریکارڈ قبضے میں لے لیا۔اینٹی کرپشن کی ٹیم رنگ روڈ منصوبے کی دستاویزات کا جائزہ لے گی۔

ذرائع کے مطابق   رنگ روڈ منصوبے کا پی سی وی ،الائنمنٹ پلان  اور میٹنگ منٹس تحویل میں لے لئے گئے ہیں ۔رنگ روڈ  منصوبے کے اطراف ہاؤسنگ سوسائٹیوں کا ریکارڈ بھی قبضے میں لیا گیا ہے۔روات ٹی چوک سے اٹک لوپ تک تمام موضع جات کا ریکارڈ بھی قبضے میں لے لیا گیا ہے۔

گزشتہ ہفتے چئیرمین نیب نے رنگ روڈ راولپنڈی منصوبہ میں مبینہ طور پر اربوں روپےکی کرپشن اور غیر قانونی لینڈ ایکوزیشن کا نوٹس لے لیا  تھا۔

یاد رہے کہ حکومتی تحقیقات میں یہ الزام لگایا گیا تھا کہ راولپنڈی میں رنگ روڈ منصوبے کی ترتیب (لے آؤٹ) کو تبدیل کرکے کچھ ہاؤسنگ سوسائٹیوں کو فائدہ ہوا ہے۔

فیکٹ فائنڈنگ رپورٹ کے مطابق ، راولپنڈی کے سابق کمشنر کیپٹن (ر) محمد محمود اور لینڈ ایکوزیشن کے معطل کمشنر وسیم تابش نے اراضی کے حصول کے لئے 2.3 ارب روپے ادا کیے اور اس علاقے کے ایک معروف خاندان  کو فائدہ پہنچایا۔