الیکشن کمیشن نے تاریخ کے بدترین انتخابات کرائے، اسد قیصر

 تحریک انصاف کے رہنما اسد قیصر نے کہا ہے کہ الیکشن کمیشن نے تاریخ کے بدترین انتخابات کرائے۔ کل ن لیگ اور پیپلز پارٹی کے درمیان عہدوں کی بندربانٹ کی گئی۔ ن لیگ کی تو 23 سیٹیں بھی نہیں، مینڈینٹ ان کے پاس نہیں، لوگوں میں کچھ شرم حیا ہونی چاہیے۔

اڈیالہ جیل کے باہر میڈیا سے گفتگو کرتے ہوئے اسد قیصر نے کہا کہ پیپلز پارٹی اور مسلم لیگ ن کے درمیان حکومت سازی کے معاملات طے ہونے پر ردعمل دیتے ہوئے کہا ہے کہ شہباز شریف میں اخلاقیات ہو تو شکست تسلیم کریں، جعلی وزیر اعظم اور کابینہ ہو گی، ان لوگوں کو کوئی بھی قبول نہیں کرے گا۔

اسد قیصر نے کہا کہ کل عہدوں کی بندر بانٹ کی گئی ہے، مینڈیٹ ان کے پاس ہے نہیں، ان لوگوں کو شرم حیا اور وقار ہونا چاہیے۔ یہ پی ڈی ایم 2 ہے ، ان لوگوں نے ملک کو کنگال کیا۔ تحریک انصاف کو جعلی طریقے سےباہر رکھا گیا، کراچی اور پنجاب میں ہمارا مینڈیٹ چوری ہوا۔میرٹ پر فیصلہ ہو تو ہماری حکومت بنے گی۔

انہوں نے کہا کہ یہ لوگ ذہنی طور پر ہارے ہوئے ہیں، پنجاب میں ہمارا مینڈیٹ چوری کیا گیا، ہم لوگ عوام میں جائیں گے ، قانونی جنگ بھی لڑیں گے، میرٹ پر فیصلے ہوئے تو ہماری حکومت ہو گی ، بانی پی ٹی آئی عمران خان وزیر اعظم ہوں گے۔ ہمیں اب بھی عدالتوں سے امید ہے، پنجاب میں ہماری 220 اور 180 وفاق میں سیٹیں ہیں، فارم 45 قانونی دستاویز ہے، کمشنر راولپنڈی کے انکشافات پر جوڈیشل کمیشن بنایا جائے۔

انہوں نے کہا کہ اسلام آباد ہائی کورٹ سے بانی پی ٹی آئی سے ملنے کی اجازت لی تھی، جیل انتظامیہ نے کہا ہے کہ کل آئیں، کل بانی پی ٹی آئی سے ملاقات کے لیے پھر آؤں گا۔