پشاور ہائی کورٹ نے اسد قیصر کا نام ای سی ایل سے نکالنے کا حکم دے دیا

پشاور: پشاور ہائی کورٹ نے سابق اسپیکر قومی اسمبلی اور پاکستان تحریک انصاف (پی ٹی آئی) کے رہنما اسد قیصر کا نام ایگزٹ کنٹرول لسٹ (ای سی ایل) سے نکالنے کا حکم دے دیا۔

تفصیلات کے مطابق جسٹس شکیل احمد اور جسٹس صاحبزادہ اسد اللہ نے کیس کی سماعت کی، عدالت نے قیصر کا نام ای سی ایل میں ڈالنے کا 23 جون کو دیا گیا حکم نامہ غیر آئینی قرار دیا۔

اسد کے وکیل معظم بٹ نے بتایا کہ قیصر قومی اسمبلی کے سابق سپیکر تھے اور وہ عمرہ کی ادائیگی کے لیے سعودی عرب جارہے تھے لیکن حکام نے انہیں روک دیا۔

جسٹس اسد اللہ نے استفسار کیا کہ اسد کا نام ای سی ایل میں کس تاریخ کو ڈالا گیا؟ معظم بٹ نے جواب دیا کہ 23 جون کو قیصر کا نام ای سی ایل میں ڈالا تھا۔

جسٹس شکیل احمد نے استفسار کیا کہ کیا اب رکن قومی اسمبلی مقرر ہو گئے ہیں؟ اسد کے وکیل نے جواب دیا کہ ہاں وہ رکن قومی اسمبلی ہیں اور سینئر سیاستدان بھی ہیں۔

تاہم پی ایچ سی نے اسد کا نام فوری طور پر ای سی ایل سے نکالنے کا حکم دے دیا۔