ملک کو مشکلات سے نکالنا ایک بڑا چیلنج ہے ، نواز شریف

لاہور میں ن لیگ کے پارلیمانی پارٹی اجلاس کے بعد پریس کانفرنس کرتے ہوئے نواز شریف نے کہا کہ یقین ہے ڈیڑھ سے 2 سال میں پاکستان مشکلات سے نکل جائے گا، ہم نے مل کر پاکستان کے زخم بھرنے ہیں، ہم سب نے مل کر ملک کو مشکلات سے نکالنا ہے۔

نواز شریف  نے کہا کہ آج پاکستان کو اپنی پرانی حالت میں لانا ایک بہت بڑا چیلنج بن چکا ہے ، آج بہت مشکل حالات ہیں، بڑامسئلہ مہنگائی ہے لیکن نیت نیک ہوگی تو اللہ ضرور مدد کرے گا، ہم نے گیس اور بجلی کے بلوں کو کم کرنا ہے۔

سابقہ  حکومت پر تنقید کرتے ہوئےمیاں  نواز شریف نے کہا کہ ترقی کا سفر جاری رہتا تو پاکستان خطے کی بڑی طاقت ہوتا، انہوں نے اپنے دور میں کون سا منصوبہ لاؤنچ کیا، ہم نے اپنے دور میں قوم کی فلاح و بہبود کیلئے کام کیا، ہم نے ڈالر کو 104 روپے پر باندھ کر رکھا ہوا تھا، کس کے دور میں ڈالر 104 روپے سے اوپر گیا، ہم پاکستان کو گرے سے وائٹ لسٹ میں لائے، ان کو لے کر آنے والے پاکستان کے بڑے مجرم ہیں۔