سماعت کا عالمی دن آج منایا جارہا ہے

اسلام آباد: دنیا بھر کی طرح پاکستان میں سماعت کا عالمی دن اتوار کو منایا گیا جس کا مقصد قوت سماعت کے بارے میں آگاہی پیدا کرنا اور معاشرتی غلط فہمیوں کو دور کرنا ہے۔

اس سالانہ تقریب کا مقصد سماعت کے مسائل کی بروقت شناخت خاص طور پر چھوٹے بچوں میں فوری طور پر مداخلت کی اہمیت پر روشنی ڈالنا ہے۔ ورلڈ ہیلتھ آرگنائزیشن (ڈبلیو ایچ او)کے ڈائریکٹر جنرل، ٹیڈروس ایڈنوم گیبریئس نے اس دن کے حوالے سے اپنے خصوصی پیغام میں سماعت کے نقصان سے منسلک بدنما داغ پر قابو پانے کی اہمیت پر زور دیا۔

انہوں نے کہا کہ معاشرتی غلط فہمیوں اور پالیسی سازوں کی توجہ کی کمی کی وجہ سے سماعت کی کمی کو اکثر معمولی مرض سمجھا جاتا ہے۔

ڈبلیو ایچ او کے مطابق دنیا بھر میں 80 فیصد سے زیادہ سماعت کی دیکھ بھال کی ضروریات پوری نہیں ہوتیں اور بغیر کسی توجہ کے سماعت کے نقصان پر سالانہ تقریباً ایک ٹریلین ڈالر لاگت آتی ہے۔ اس کا مقابلہ کرنے کے لیے عالمی یوم سماعت 2024 عام غلط فہمیوں کو دور کرنے اور سماعت کی دیکھ بھال کے بارے میں درست معلومات فراہم کرنے پر مرکوز ہے۔