کراچی : سندھ میں عالمی بینک کے تعاون سے شمسی توانائی کامنصوبہ شروع کیا جائے گا جو کہ صاف اور سرسبز توانائی کی جانب ایک اہم قدم ہے۔

یہ بات وزیراعلیٰ سندھ سید مراد علی شاہ نے آج (ہفتہ) کو کراچی میں ایک پریس کانفرنس سے خطاب کرتے ہوئے کہی۔

وزیراعلیٰ نے کہا کہ اس اہم منصوبے کے تحت تمام سرکاری عمارتوں کو شمسی توانائی پر منتقل کیا جائے گا ، انہوں نے کہا کہ اس اقدام سے نہ صرف اخراجات میں کمی آئے گی بلکہ کاربن کے اخراج کو کم کرنے میں بھی مدد ملے گی۔

وزیراعلی نے کہاکہ اس منصوبے کے تحت حکومت تقریباً دو لاکھ گھروں کو سولر پینل مہیاکرے گی جس سے بجلی کی قلت اور بجلی کے بلوں کے بحران سے نمٹنے میں مدد ملے گی۔

منیلا: آج (ہفتے کے روز ) جنوبی فلپائن کے ساحل پر 6.8 شدت کا زلزلہ آیا، لیکن سونامی کی کوئی وارننگ جاری نہیں کی گئی اور نہ ہی کسی نقصان کی فوری اطلاع ہے۔

یونائیٹڈ اسٹیٹس جیولوجیکل سروے نے بتایا کہ زلزلہ صبح 6:30 بجے (2230 GMT) منڈاناؤ جزیرے کے مشرق میں واقع بارسلونا گاؤں سے تقریباً 20 کلومیٹر (12 میل) کے فاصلے پر آیا۔

مقامی سیسمولوجیکل ایجنسی نے کہا کہ زلزلے سے کسی نقصان کی توقع نہیں ہے۔

لنگگ میونسپلٹی میں جہاں بارسلونا واقع ہے، مقامی ڈیزاسٹر آفیسر ایان اونسنگ نے کہا کہ وہ زلزلے سے بیدار ہو گئے تھے۔

یو ایس جی ایس کے مطابق منڈاناؤ کے کچھ علاقوں میں آفٹر شاکس کا ایک سلسلہ محسوس کیا گیا، جس کی شدت 6.3 کی شدت کے ساتھ بارسلونا سے تقریباً 36 کلومیٹر مشرق میں تھی۔

یاد رہے کہ گزشتہ سال دسمبر میں ایک 7.6 شدت کا زلزلہ آیا تھا ۔اس زلزلے کے نتیجے میں 3 افراد جاں بحق ہو ئے تھے۔

وزیر اعلیٰ خیبرپختونخوا علی امین گنڈا پور نے کہا ہے کہ اسٹیبلشمنٹ سے رابطے میں ہیں ، انہوں نے کہا کہ ان سے  بات چیت ہوتی رہتی ہے، لیکن ابھی تک کوئی ٹھوس چیز نہیں بن کر نکلی۔

9 مئی واقعات پر معافی کے حوالے سے علی امین کا کہنا تھا کہ بانی پی ٹی آئی عمران خان معافی مانگنے کو تیار ہیں، لیکن پہلے غلطی ثابت کی جائے۔

راولپنڈی کی اڈیالہ جیل کے باہر میڈیا سے گفتگو میں علی امین گنڈا پور نے اپنی بات کودوبارہ  دہرایا اور مزید کہا کہ 9 مئی واقعات پر معافی مانگنے کے لیے تیار ہیں، انہوں نے کہا کہ اگر غلطی ثابت ہوئی تو ہی عمران خان صاحب  معافی مانگیں گے ۔

9 مئی کے حوالے سے ان کا مزید کہنا تھا کہ ’ہماری کوئی غلطی نہیں یہ ایک پری پلان کام ہوا ہے، غلطی آپ کی ہو اور مجھ سے کہا جائے میں معافی مانگوں، ایسا نہیں ہو گا، بیٹھیں بات کریں غلطی ثابت کریں، جتنی غلطی ہوگی اتنی معافی مانگ لیں گے۔‘

انھوں نے کہا کہ ہمارا مینڈیٹ چوری کیا گیا، آئین کو توڑا گیا، آئین کو بار بار توڑنے پر بات ضرور ہونی چاہیے ، علی امین نے مزید کہا کہ پی ٹی آئی ایک نظریے کے تحت بنی ہے، مہنگائی پر بانی پی ٹی آئی کو تشویش ہے۔

ان کا کہنا تھا کہ بانی چیئرمین نظریے پر ڈٹے ہوئے ہیں، نظریہ قید نہیں ہو سکتا، آئین کی پاسداری اور خود داری کے لئے قوم کھڑی رہی، قوم 5 اگست کو جلسہ میں بھرپور شرکت کرے۔

انہوں نے گفتگو کا اختتام کرتے ہوئے کہا کہ  پنجاب میں فسطائیت اور مقدمات ہو رہے ہیں، فارم 45 نہیں دے رہے، 47 والے اسمبلی میں بیٹھے ہیں۔