سربراہ ایم ڈبلیو ایم کو بانی چیئرمین پی ٹی آئی سے ملاقات کی اجازت

اسلام آباد ہائی کورٹ نے سربراہ ایم ڈبلیو ایم علامہ راجا ناصرعباس کو بانی پی ٹی آئی عمران خان سے ملاقات کی اجازت دیدی۔ پی ٹی آئی رہنما فردوس شمیم نقوی کو بھی پیر کے روز بانی پی ٹی آئی سے ملاقات کی اجازت مل گئی۔

بانی پی ٹی آئی سے جیل میں ملاقات کیلئے ایم ڈبلیو ایم سربراہ کی درخواست پر اسلام آباد ہائیکورٹ کے جسٹس ثمن رفعت امتیاز نے سماعت کی۔

علامہ راجا ناصرعباس اپنی وکیل ایمان مزاری کے ساتھ عدالت میں پیش ہوئے۔ عدالت نے سربراہ ایم ڈبلیو ایم کو پیر کے روز ملاقات کی اجازت دی۔ عدالت نے جیل سپرنٹنڈنٹ کو جیل مینول کے مطابق ملاقات کرنے کی ہدایت کر دی

عدالت نے وکیل درخواست گزار کو تحریری کمنٹس جمع کرنے کی ہدایت بھی کی۔ جسٹس ثمن رفعت نے ریمارکس دیے کہ کمنٹس آجائے تو اس معاملے کا مستقل حل چاہتے ہیں۔

اس کے علاوہ پی ٹی آئی رہنما فردوس شمیم نقوی کو بھی پیر کے روز بانی پی ٹی آئی سے ملاقات کی اجازت مل گئی۔

عدالت نے کیس کی سماعت جمعہ تک ملتوی کردی۔