بانی چیئرمین پی ٹی آئی سے ملاقات نہ کرانے پر سپرنٹنڈنٹ اڈیالہ جیل کو نوٹس جاری

توہین عدالت کیس، اسلام آباد ہائیکورٹ نے بانی چیئرمین پی ٹی آئی عمران خان  سے ملاقات نہ کرانے پر سپرنٹنڈنٹ اڈیالہ جیل کو نوٹس جاری کر دیا۔

اسلام آباد ہائیکورٹ میں عدالتی احکامات کے باوجود بانی چیئرمین پی ٹی آئی سے ملاقات نہ کرانے پر مجلس وحدت المسلمین کے سربراہ علامہ ناصر عباس کی درخواست پر جسٹس سمن رفعت امتیاز نے سماعت کی۔

درخواست گزار کے وکیل نے کہا کہ اسلام آباد ہائیکورٹ نے 8 مارچ 2024 کو عمران خان  سے ملاقات کرانے کے احکامات جاری کئے لیکن سپرنٹنڈنٹ جیل نے جان بوجھ کر حکم عدولی کرتے ہوئے ملاقات نہ کرائی۔

وکیل نے مزید کہا کہ سپرنٹنڈنٹ جیل کے خلاف توہین عدالت کی کارروائی کرکے بانی چیئرمین پی ٹی آئی سے اہل خانہ اور وکلا کی ملاقات کرائی جائے۔

عدالت نے درخواست گزار کے وکیل کے دلائل سننے کے بعد سپرنٹنڈنٹ اڈیالہ جیل کو 15 مارچ کیلئے نوٹس جاری کردیا۔