وزیراعظم کی غیرقانونی سرگرمیوں کیخلاف بھرپور اقدامات اٹھانے کی ہدایت

اسلام آباد: وزیراعظم محمد شہبازشریف نے تمام متعلقہ حکام کو ہدایت کی ہے کہ وہ مقررہ مدت کے دوران کامیابی کا حصول یقینی بنانے کے لئے تمام جرائم پیشہ افراد اور غیر قانونی سرگرمیوں کے خلاف اقدامات کو بھرپور طریقے سے آگے بڑھائیں۔وہ اسلام آباد میں ایک اجلاس کی صدارت کررہے تھے جس میں ''غیر قانونی سرگرمیوں اور جرائم پیشہ مافیاز کے خلاف اقدامات'' کے ایجنڈے پر غور کیا گیا۔

وزیراعظم نے ملک کو معاشی استحکام کی راہ پر گامزن کرنے کے لئے سمگلنگ بجلی و ٹیکس چوری اور دیگر جرائم کو روکنے کے لئے مشترکہ کوششوں پر زور دیا۔انہوں نے کہا کہ محصولات بجلی اور گیس کے شعبوں میں بڑے پیمانے پر چوری کی روک تھام کے لئے مسلح افواج سمیت وفاقی وصوبائی حکومتوں اور تمام اداروں کو ملکر کام کرنا چاہئے۔شہباز شریف نے کہا کہ بجلی کے ترسیلی ضیاع کے علاوہ ہمیں سالانہ پانچ سو ارب روپے کی بجلی چوری کا سامنا ہے۔

انہوں نے کہا کہ گیس کی چوری سے بھی معیشت بری طرح متاثر ہو رہی ہے، ٹیکس نظام میں خامیوں کے بارے میں باتیں کرتے ہوئے وزیراعظم نے کہا اربوں روپے کے محصولات قومی خزانے سے باہر ہیں۔

انہوں نے کہا ستائیس سوارب روپے کے ٹیکس مقدمات مختلف ٹربیونلز میں زیر التواء ہیں۔وزیراعظم نے کہا اگر ہم اس رقم کا نصف بھی وصول کر لیں تو پاکستان کا غیر ملکی قرضوں پر انحصار کم کیا جاسکتا ہے جو ملک میں مزید کینسر ہسپتالوں کی تعمیر تعلیم کے شعبہ میںبہتری لانے اور بنیادی ڈھانچے کی ترقی کے لئے کافی ہوگا۔شہبازشریف نے کہا حکومت نے ٹیکسوں کے نظام کی اصلاح اور ہر قسم کی ٹیکس چوری کی روک تھام کا فیصلہ کیا ہے اور اس سلسلے میں کسی اثر و رسوخ پر کوئی سمجھوتہ نہیں کیا جائے گا۔

ملک میں امن عامہ کی صورتحال کے بارے میں وزیراعظم نے کہا کہ انہوں نے وزیر داخلہ کو پوری طرح چوکس رہنے اور صوبوں کے ساتھ مربوط روابط قائم کرنے کی ہدایت کی ہے تاکہ لوگوں کے جان و مال کا تحفظ یقینی بنایا جاسکے۔بری فوج کے سربراہ جنرل عاصم منیر نے اس موقع پرقومی معیشت کی بحالی سے متعلق حکومتی اقدامات کی حمایت کے لئے پاک فوج کے غیر متزلزل عزم کی یقین دہانی کرائی۔