بانی چیئرمین پی ٹی آئی کی رہائی سے متعلق بیرسٹر گوہر کی بڑی پیش گوئی

پاکستان تحریک انصاف کے چیئرمین بیرسٹر گوہر نے کہا ہے کہ عمران خان اپریل کے آخر یا مئی کے پہلے ہفتے جیل سے باہر ہوں گے۔

اسلام آباد میں میڈیا سے گفتگو کرتے ہوئے بیرسٹر گوہر نے کہا کہ بانی چیئرمین پی ٹی آئی اپریل کے آخر یا مئی کے پہلے ہفتے جیل سے باہر ہوں گے۔پارٹی میں اختلافات کی تردید کرتے ہوئے انہوں نے کہا کہ سب بانی چیئرمین پی ٹی آئی کی مشاورت سے کام کر رہے ہیں۔

چیئرمین پی ٹی آئی نے کہا کہ 13 اپریل کو پشین میں احتجاجی جلسہ کریں گے جبکہ گوجرانوالہ میں اتحادی جماعتوں کے ساتھ مل کر جلسہ ہو گا۔ تمام جلسوں کا مقصد عدلیہ کی آزادی اور چوری شدہ مینڈیٹ کی واپسی ہے۔

انہوں نے مزید کہا کہ شہریات آفریدی کے بیان پر مجھے شکایت ہے، انہیں جلسے کی بجائے اپنا موقف پارٹی پلیٹ فارم پر دینا چاہیئے تھا۔

ان کا کہنا تھا کہ خیبر پختونخوا کی صوبائی حکومت ترقیاتی کاموں کے میگا پراجیکٹس کا آغاز جلد کرے گی۔ آئی جی، چیف سیکرٹری کی تقرری اور مرکز کے ذمے بقایاجات پر تحفظات ہیں۔ وفاقی حکومت کو ہماری حکومت کے یہ تحفظات دور کرنے چاہئیں۔