سعودی وفد کے دورے سے پاکستان میں اربوں ڈالر کی سرمایہ کاری ہوگی، وزیر اعظم پاکستان

وزیراعظم شہباز شریف نے کہا ہے کہ سعودی ولی عہد محمد بن سلمان کے مشکور ہیں کہ ان کی خصوصی دلچسپی کے تحت سعودی وفد نے پاکستان کا دورہ کیا۔  سعودی وفد کے دورے سے پاکستان میں اربوں ڈالر کی سرمایہ کاری ہوگی۔

وزیراعظم شہباز شریف کی زیر صدارت وفاقی کابینہ کا اجلاس ہوا جس میں انہوں نے گفتگو کرتے ہوئے کابینہ کو عیدالفطر کی مبارکباد پیش کی اور رمضان المبارک کی برکتوں کے طفیل پاکستان کیلئے ترقی و خوشحالی کیلئے دعا کی۔

وزیراعظم شہباز شریف نے کہا کہ سعودی ولی عہد محمد بن سلمان کے مشکور ہیں کہ میرے حالیہ دورے کے بعد ان کی خصوصی دلچسپی کے تحت سعودی وفد نے پاکستان کا دورہ کیا۔  

وزیراعظم شہباز شریف نے وفاقی کابینہ اور متعلقہ حکام کی سعودی وفد کے کامیاب دورے کے کیلئے کاوشوں کی پزیرائی کرتے ہوئے کہا کہ سعودی وفد پاکستان وزراء اور حکام کی تیاری سے متاثر ہوا ہے جس کا سعودی وزیر خارجہ شہزادہ فیصل بن فرحان آلسعود نے برملا اظہار کیا۔ سعودی وفد کے دورے سے پاکستان میں اربوں روپے کی سرمایہ کاری ہو گی۔

شہباز شریف نے مزید کہا کہ عوام سے کئے گئے عہد کے مطابق پاکستان کی ترقی و خوشحالی کیلئے دن رات محنت کریں گے ، مجھے یقین ہے کہ اسی طرح محنت کرتے رہے تو پاکستان کی ترقی وخوشحالی اور معاشی استحکام کے اہداف جلد حاصل کر لیں گے۔