خود کو ڈیمو کریٹک کہنے والے فوج کو کہتے ہیں حکومت گرا دو : وزیراعظم

تفصیلات کے مطابق وزیر اعظم نے اسلام آبا دمیں 62 کلومیٹڑ طویل  لودھراں ملتان ہائی وے کی ترقی اور بحالی کا سنگ بنیاد رکھ دیا،  وزیر اعظم  نےسنگ بنیاد کی تقریب سے خطاب کرتے ہوئے  کہا کہ تحریک انصاف کی حکومت میں آنے کے پہلے ہفتے ہی لوگوں نے سوال کرنا شروع کردیا تھا کہ نیا پاکستان کہاں ہے۔ان کا کہنا تھا کہ 'ہم نے بہت صبر کیا، اپوزیشن نے بھی بہت تنقید کی اور ہمارے لوگوں کو بہت مشکل وقت سے گزرنا پڑا۔انہوں نے کہا کہ لوگوں کو بھی میڈیا نے ایسا تاثر دیا تھا کہ ایک بٹن دباتے ہی نیا پاکستان بن جائے گا، معاشرے میں جدوجہد سے تبدیلی آتی ہے، کوئی معاشرہ بغیر جدو جہد کے تبدیل نہیں ہوسکتا۔ یہ ایسے ہی ہے جیسے خود کو آزاد کرنا ہے جیسے انگریزوں سے آزادی حاصل کی گئی تھی، چاہے مافیا سے یا کرپٹ نظام سے آزادی حاصل کرنی ہو یہ فوراً نہیں ہوسکتی اس کے لیے جدوجہد کرنی ہوگی۔

انہوں نے کہا کہ پاکستان کا نظام بدلنے کے لیے ایک بہت بڑی جدو جہد چل رہی ہے، ہرجگہ مافیاز بیٹھے ہوئے ہیں جن کے خاتمے کے لیے ہماری جدوجہد  جاری ہے ، جدو جہد قانون کی حکمرانی کی جدو جہد ہے، آج جو بھی ملک خوشحال ہے وہاں قانون کی حکمرانی ہے، وہاں کوئی چینی، قبضہ، سیاسی مافیا نہیں۔ان کی چوریاں سامنے آرہی ہیں اس لیے یہ پریشان ہیں ۔

وزیراعظم عمران خان  نے مزید  کہاکہ پاکستان میں سیاحت کے بہترین مواقع ہیں، کورونا کی وجہ سے سیاحت کا شعبہ بہت متاثر ہوا، اب جیسے جیسے دنیا میں ویکسین لگائی جارہی ہیں یہ شعبہ واپس بحال ہوگا۔ ملکی انڈسٹری اور زراعت کی ترقی کیلئے اقدامات کیے  ہیں ۔ تعمیراتی شعبے   کی سرگرمیوں میں  اضافہ ہواہے اورلوگوں کو روزگار مل رہاہے۔ انہوں نے مزید کہا کہ قوم کو کہنا چاہتا ہوں مشکل وقت سے ہم نکل گئے ہیں، اب نمو کا وقت ہے لوگوں کو نوکریاں دینے کا وقت ہے۔