سندھ میں 9ویں جماعت اور اس سے اوپر کی کلاسز کل سے شروع کرنے کا فیصلہ

تفصیلات کے مطابق سندھ میں تعلیمی سرگرمیاں بحال کرنے کا اعلان کردیا  گیا۔ تمام تعلیمی ادارے سات جون سےتدریس شروع کرینگے۔

  وزیر اعلی سندھ مراد علی شاہ کا کہنا ہے کہ  9 ویں  اور اس سے اوپر کی کلاسز کل سے شروع ہوجائیں گی۔

قبل ازیں  وزیرتعلیم سندھ کا کہنا تھا کہ  آج ہم طلبا کے امتحان یا پروموٹ اور تعلیمی اداروں کی بندش سمیت دیگر اہم فیصلے کریں گے، سندھ حکومت نے واضح کردیا تھا کہ آئندہ فیصلے تک اسکول بند رہیں گے۔

سعید غنی نے بتایا کہ روزانہ کی بنیاد پر ایک ہزار کیسز رپورٹ ہورہے ہیں۔ عید کے دوران لاک ڈاؤن سے کم کیسز رپورٹ ہوئے تھے، سندھ حکومت کی جانب سے کسی نے نہیں کہا کہ کورونا ختم ہوگیا، یہ ضرور کہا ہے کہ کورونامیں کمی ہوئی ہے۔

وزیر کا کہنا تھا کہ ہم سمجھتے ہیں کورونا سے بچاؤ کے لیے اگر کچھ سخت فیصلے کرنا پڑیں توکریں، یہاں سخت فیصلے کیے جاتے ہیں تو باتیں بننا شروع ہوجاتی ہیں، ہمیں کورونا پر سیاسی پوائنٹ اسکورننگ نہیں کرنی چاہیئے۔

خیال رہے کہ  وزیر تعلیم پنجاب مراد راس نے بھی سات جون سے لاہور سمیت باقی اضلاع میں تعلیمی ادارے کھولنے کا اعلان کیا تھا۔

وزیر تعلیم  پنجاب مراد راس نے کہا تھا پنجاب کے بیس اضلاع میں تعلیمی ادارے کھولنے کے حوالے سے این سی او سی میں مشاورت ہوئی، بیس اضلاع میں پچاس فیصد حاضری کی پالیسی پر عملدرآمد ہوگا ، گورنمنٹ کے ایس او پیز پر عملدرآمد کیا جائے۔