صوبوں اور وفاق کو فائزر ویکسین کی فراہمی شروع

تفصیلات کے مطابق وزیر اعظم عمران خان کے معاون خصوصی برائے صحت ڈاکٹر فیصل سلطان  نے کہا ہے  کہ کورونا سے حفاظت کیلئے  فائزر ویکسین صرف کمزور قوت مدافعت والے افراد کو لگائی جائے گی۔ کمزورقوت مدافعت والے افراد کی وضاحت کچھ دیرمیں منسٹری کی ویب سائٹ پر کردی ‏جائے گی۔

وزارت  صحت  حکام کے مطابق پورے ملک میں فائزرویکسین کی 51 ہزارخوراکیں تقسیم کی جا رہی ہیں، پاکستان کو کوویکس کے ذریعے فائزر ویکسین کی ایک لاکھ 6 ہزارخوراکیں ملی ہیں، ‏ جس میں سے پنجاب کو ایم آر این اے ویکسین کی 26 ہزار خوراکیں ملیں گی۔ سندھ کو 12ہزار  اور خیبر پختونخوا  کو آٹھ ہزار خوراکیں ملیں گی ۔ وزارت صحت کے مطابق بلوچستان کو ویکسین کی صرف 2000 خوراکیں ملیں گی جبکہ اسلام آباد، گلگت بلتستان اور آزاد کشمیر کو ایک ایک ہزار خوراکیں  دی جائیں گی ۔

 وزارت صحت کے مطابق فائز رویکسین پورے ملک کے 15 شہروں میں لگائی جائے گی ، پاکستان کے پندرہ شہروں میں الٹرا کولڈ چین ریفریجریٹر موجود ہیں۔دوسری جانب کورونا ویکسین فائزرز کے حوالے سے این سی او سی نے  گائیڈ لائنز جاری کردی ۔فائزرز ویکسین 18 سال اور زائد عمر کے افراد کو لگائی جاسکتی ہے،پاکستان میں فائزر ویکسین کی محدود مقدار ہی دستیاب ہے، فائزر کورونا کے ہائی رسک بیمار مریضوں کو لگائی جائے، فائزر ویکسین عازمین حج، سٹڈی اور ورک ویزہ کے حامل افراد کو لگائی جائے گی ۔گائیڈ لائنزکے مطابق ویکسین حاملہ اور دودھ پلانے والی ماؤں کو بھی لگائی جاسکتی ہے، امراض جگر اور دائمی ہیپاٹائٹس کے مریض بھی فائزر لگوا سکتے ہیں، ٹرانسپلانٹ کے منتظر افراد دو ہفتے قبل فائزر لگوا سکتے ہیں، ٹرانسپلانٹ کروانے کے ایک ماہ بعد مریض ویکسین لگوا سکتے ہیں۔

گائیڈ لائنز میں کہا گیا ہے کہ  بخار میں مبتلا افراد کو فائزر ویکسین مت لگائی جائے، کورونا کے مریضوں کو بھی فائزر ویکسین نہ لگائی جائے، شدید الرجی کا شکار افراد کو  فائزر نہ  لگائی جائے جبکہ فائزر ویکسین کی دوسری ڈوز اکیس دن بعد لگائی جائے گی۔

واضح رہے کہ ملک بھر میں  کورونا ویکسی نیشن کے عمل کا آغاز ہوچکا ہے ، منصوبہ بندی کے وزیر اسد عمر نے کہا ہے کہ  ملک بھر میں انسداد کورونا ویکسی نیشن کے 1700 مراکز قائم کئے گئے ہیں اور این سی او سی نے آئندہ دنوں میں چار ہزار مراکز قائم کرنے کا ہدف مقرر کیا ہے۔

حکومت    پاکستان نے 10 مارچ سے  60 سال سے زائد عمر کے افراد کیلئے کورونا ویکسینیشن  کا آغاز کیا  ،  پاکستان میں جہاں حکومت کی جانب سے فرنٹ لائن ہیلتھ ورکرز یعنی طبی عملے اور 60 سال سے زائد عمر والے افراد کو کورونا سے بچاؤ کی مفت ویکسین لگانے کا سلسلہ جاری ہے وہیں نجی دوا ساز کمپنیوں کی جانب سے بھی فروخت کے لیے ویکسین درآمد کی جا رہی ہیں۔