وزیر اعظم منگل سے چین کا دورہ کریں گے

وزیراعظم محمد شہبازشریف چین کے صدر شی جن پنگ اور وزیراعظم لی چیانگ کی دعوت پر منگل سے چین کا پانچ روزہ سرکاری دورہ کرینگے۔

وہ تین مرحلوں پر مشتمل اپنے دورے میں بیجنگ کے علاوہ ایکسن اور شینزن  شہروں کا دورہ کریں گے۔

شہبازشریف بیجنگ میں صدر شی چن پنگ سے ملاقات کرینگے اور وزیراعظم لی چیانگ سے وفود کی سطح پر بات چیت کریںگے۔وہ نیشنل پیپلز کانگریس کی قائمہ کمیٹی کے چیئرمین زہاؤ لیجی  اور اہم سرکاری محکموں کے سربراہوں سے بھی ملاقاتیں کرینگے۔وزیراعظم کے دورے کا ایک اہم حصہ تیل، گیس، توانائی، اطلاعاتی اور مواصلاتی ٹیکنالوجی اور نئی سامنے آنے والی ٹیکنالوجیز کی صف اول کی چینی کمپنیوں کے سربراہوں سے ملاقاتوں پر مشتمل ہوگا۔

وزیراعظم شینزن میں چین پاکستان تجارتی فورم سے خطاب کریںگے جس میں دونوں ملکوں کے ممتاز تاجر، صنعت کار اور سرمایہ کار شامل ہوںگے۔وہ چین میں اقتصادی اور زرعی زونز کا دورہ بھی کرینگے۔

فریقین چین پاکستان اقتصادی راہداری کو مزید ترقی دینے اور تجارت اور سرمایہ کاری کے فروغ پر مذاکرات کریںگے۔مذاکرات کے دوران سلامتی اور دفاع، توانائی، خلا، سائنس اور ٹیکنالوجی اور تعلیم کے شعبوں میں تعاون بڑھانے پر غور کیا جائیگا۔